政圈近排興講辭職、退黨，立法會尋日辯論二○一二年立法會議員產生辦法嘅修正案時，白鴿黨、公文袋都有人大講退黨，保險界嘅陳健波亦唔執輸，發言時斥責激進泛民主派人士抹黑功能界別，蒙騙不知情嘅市民，言談間更流露當年進身功能界別議員嘅悔意，仲大番對手話：「如果冇咗功能界別就天下太平嘅話，我寧願即刻辭職。」
陳健波真係要辭職？睇佢前文後理，頂晒籠係攞封辭職信嚟撐吓啫，旨在話畀人知「我唔驚冇咗份工㗎」。佢跟住話，啲泛民議員講到普選好巴閉，但係「歐美夠有普選啦，失業率咪高達一成，比香港仲嚴重！」佢指香港嘅功能界別選舉制度有問題，需要解決係事實，但絕唔係廢除咗功能界別就可以天下太平。
五散人之一嘅陳健波又嗌啲泛民人士唔好郁吓就謾罵：「近排嘅事睇到我好氣憤，有啲人打住民主旗號，行為卻反民主。」佢跟住大呻早知咁多爭拗，就唔做功能界別議員，因為入咗立法會後好少時間陪囝囝，錢都搵少咗。佢講時一臉不在乎，好似要押上議席同泛民開戰咁。不過，佢當年入功能界別時，香港政治環境已經好複雜啦，依家先悔不當初，係遲鈍定為理想呢？