立法會一連兩日辯論政改方案，前晚十點結束會議後，白鴿黨三子包括主席鐵頭仁、張文光同甘乃威，啱啱踏出立會大樓，便被反政改人士包圍、喝倒采、掟雜物甚至潑埋水添。點解白鴿黨八個議員得三個嚟受靶呢？
因為前晚十點鐘，世界盃十六強賽事正值英格蘭對斯洛文尼亞，關乎英格蘭有冇機會晉級，立法會一散會，啲議員就急急腳去睇波，「肥仔明」李華明提早十幾分鐘已閃人，搭港鐵返屋企睇波；「高達」李永達同黃成智就分頭去灣仔酒吧睇波，不過佢哋唔係一齊，高達一個人去，黃成智就係約咗個仔；至於另一副主席劉慧卿雖然冇睇波，但就喺後門同建制派議員一齊坐立法會專車走。