負責度呢兩條宣傳片嘅新聞處處長Michael黃偉綸尋日出席立法會午宴時，就問吓議員嘅意見。佢簡直係自討沒趣，班議員大數宣傳片嘅不是，好似話《還原基本步》嘅女主角年紀太大，搞到成條片好似拍畀中年人睇咁，吸引唔到年輕人支持政改。

打麻雀短片好彩冇出街

Michael仲死撐話因為要襯番個男主角，先搵個比較成熟嘅女性。佢仲專登話條片由新聞處度橋到搵人拍攝到真正出街，都只係用咗個幾禮拜，唔通係暗示時間唔夠，所以拍到呢個質素都應該收貨？

另外一條片雖然有個年輕貌美嘅女主角，但都係劣評如潮！Michael亦話收到好多意見書，仲有市民寫咗幾千字嚟鬧新聞處，嫌條裙用紫色太樣衰，真係估都估唔到。

咁都估唔到，擺明係佢錯估形勢同掌握唔到市民脈搏，所以咪諗錯咗囉。咁都不特止，佢仲自爆之前諗咗個宣傳政改嘅廣告，內容係四個人打麻雀，其中一個叫胡但冇食到，最後就出句宣傳口號：「有胡唔食，罪大惡極」，寓意如果唔通過政改方案，就會受到千夫所指。不過新聞處最後驚市民投訴政府變相鼓吹賭博，最後都係冇用到。嘩！咁都得，好彩呢條短片冇出到街，否則佢肯定畀班議員插得更勁。

正所謂低處未算低，今日班高官落區派傳單嘅策略都唔好得去邊。傳聞煲呔曾為咗唔想畀「80後」追擊，死都唔肯公開落區行程，但最錯嘅係，佢今次落區嘅口號係：「為香港起錨，支持二○一二政改方案」。大家都知泛民破冰不成，大大座冰山喺面前，政改之船強行起錨航行分分鐘一頭撞落冰山，一拍兩散。幫煲呔曾度呢個口號嘅人，到底係過分樂觀，定係盲目到睇唔到目前形勢嚴峻呢？