保安局局長李少光嘅細女李卓穎（Claren）同男友姚舜城（Ken）尋日拉埋天窗，光哥舊年十月先做阿爺，咁快嫁女梗係笑瞇瞇。據講，細女結婚後會搬去沙田，同佢哋夫婦同一屋苑居住，問光哥點睇女婿，佢話：「總之個女滿意，我就滿意喇！」李太就大讚女婿Ken好乖好抵錫。
Claren同Ken於澳洲讀書相識，Claren修讀會計，Ken就主修酒店管理，五年前嘅復活節兩人喺悉尼一個遊樂場經朋友介紹認識，然後拍拖，五年後專登揀復活節拉埋天窗。尋日下午二時，佢哋先喺旺角亞皆老街神召會禮拜堂行禮，夜晚就喺金鐘港麗酒店筵開二十九席。
好多賓客下晝觀禮，晚宴更墟冚，運輸及房屋局局長鄭汝樺、消防處長盧振雄夫婦、廉政專員湯顯明、政務司司長三母子等，立法會議員就有林健鋒夫婦、黃宜弘夫婦、方剛夫婦、張宇人夫婦、梁君彥等。前商務及經濟發展局局長馬時亨太太王培琪仲係兩場去晒，相當畀面。