根據立法會原訂嘅立法議程，今個立法年度政府總共要向立法會提交二十二條法案，上半年就要交八條，當中包括由環境局負責嘅《汽車引擎空轉（定額罰款）條例草案》，即係硬性規定司機停車要熄匙，否則罰款嘅草案，應該大約喺農曆新年前就要向立法會提交。

喺立法會尋日發出嘅更新版立法議程內，發現有八條草案已經提交咗，但唔好以為政府已經達標，其實原本應該要處理嘅停車熄匙草案就仲係「榜上無名」，即係市民平時行街仍然要忍受廢氣嘅「薰陶」。老實講，停車熄匙大大話話擾攘咗十年，因為涉及到職業司機嘅飯碗，爭拗沒完沒了，睇怕呢次又再拖延，應該都係傾唔掂數。

政府提草案數目僅合格

政府一直話要推動綠色生活，除咗停車熄匙外，早前嘅膠袋徵費搞到市民一頭煙，推動電動車計劃又有頭威冇尾陣，邱騰華可謂衰完一鑊又一鑊。如果佢再唔做番啲嘢，睇嚟民怨會好似啲滾油咁兜頭淋佢，到時都唔知點收科。

其實政府嘅草案遲遲未上立法會並唔係乜嘢新鮮事，立法會內務委員會主席劉健儀亦曾經鬧過政府年年都遲交草案，成日都由上半年拖到下半年，再唔係就要「責年」，搞到議員做嘢失晒預算。

今次政府上半年「僅僅合格」，都係因為財經事務及庫務局局長「掹車邊」喺過年前交咗《商業登記（修訂）條例草案》同《公司（修訂）條例草案》。不過作為全港七百萬人嘅領導，就算僅僅合格都唔係啲咩值得高興嘅事，煲呔曾政府幾時先識得自我改進，好好咁表現一次畀香港人睇呢？