昂坪360即將推出「空中貴賓廂」，來回雙程包廂盛惠二千九百蚊，專向有銀一族招手。昂坪360董事總經理李殷泰（YT）尋日粉墨登場做推銷員，賣花讚花香話，喺豪華車廂欣賞大自然景色係獨一無二體驗。佢仲打算搵旅發局主席田北俊嚟試搭，話晒田少樣樣都要最豪，揸車要揸法拉利，搭纜車自然都要搭貴賓廂啦！
呢架「空中貴賓廂」，車身外觀為高貴嘅香檳金色，裏面嘅酒紅色絲絨地氈及座椅，更鑲滿施華洛世奇水晶，係名副其實嘅水晶車廂，下周六正式載客。車廂裏雖然設有酒櫃，但根據港鐵條例，乘客係唔可以喺車廂飲食，所以酒櫃純屬裝飾而已。
YT話，今次係佢哋同施華洛世奇嘅crossover，超豪包裝絕對稱得上係纜車一姐！至於纜車公司服務，佢就誇下海口，話如果有客人求婚，佢哋可以代為買花甚至求婚鑽戒，仲保證百分百成功，否則原銀奉還喎。搭纜車包結婚，唔係吖嘛？