本文重點
有富貴黨背景嘅旅遊業議會現任主席何栢霆做足六年，尋日鐵定卸任，由經濟動力成員、香港旅行社協會主席胡兆英同無黨派嘅葉慶寧拗手瓜，最終胡兆英以十八票支持、八票反對，一票棄權（兩名理事缺席）當選新主席，而何栢霆則退居幕後，任議會名譽顧問。
阿Paul有心攪局
老實講，旅遊業議會早前上演現實版《宮心計》，有人決心入會踢走對手。話說立法會旅遊界代表「法律超人」阿Paul謝偉俊一心想攪局，早前搵恩師侯叔祺選理事，點知意外落選，失去主席候選資格。
胡兆英今次當選可謂為經濟動力贏咗漂亮一仗，但亦令人聯想佢會朝住三年後立法會旅遊界議席進發，再加上早前有消息話經濟動力想撬身兼富貴黨黨員嘅旅議會總幹事董耀中過檔，似係想將富貴黨喺旅議會嘅勢力一Q清枱。
但有消息話何栢霆、董耀中同胡兆英根本係同聲同氣，早喺年前佢哋就開始部署，將胡兆英捧上主席位，所以就算胡兆英加入退出富貴黨另起爐灶嘅經濟動力，雖然係唔同政黨，但今次胡兆英當選，背後嘅意義可以話係兩黨雙劍合璧，成功撞走「法律超人」呢個外敵於門外就真！