立法會喜事多。白鴿黨嘅涂謹申下個禮拜就會同女友拉埋天窗，尋日佢趁立法會大會舉行嘅時間，喺記者室大派西餅，仲附送有佢同未婚妻喺綠野嬉戲甜蜜合照嘅年曆。阿涂一邊派餅，一邊笑到見牙唔見眼，一副幸福到漏嘅樣。
有記者打趣咁問佢幾時派紅雞蛋時，阿涂即刻面都紅晒，畀生仔呢個問題難倒：「乜你問埋啲咁敏感嘅嘢㗎！」說罷就想側側膊，點知又有人用近日最流行嘅政改術語，追問佢幾時先有生仔時間表，阿涂見避無可避，惟有彈句：「使唔使講埋路線圖呀？」之後即刻閃人。生仔都要時間表同路線圖？阿涂真係好認真噃！或者佢嘅喜事路線圖上，真係喜餅之後就係紅雞蛋呢！
