本文重點
曾蔭權喺施政報告中宣布派百元慳電膽現金券後，畀人踢爆佢明益親家、涉利益輸送，結果搞到個計劃同政府都灰頭土臉，最終被迫叫停；之後又迴避參加聯合國氣候變化大會，成為各界關注嘅事，仲畀人封咗做「氣候逃犯」。尋日立法會辯論氣候議題，好多議員發言時都批評佢，連資訊科技界代表「IT豪」譚偉豪都踩番兩腳，揶揄煲呔曾對環保認識唔多，要送本書畀佢學吓嘢喎！
送本書畀佢參考
IT豪一向甚少觸及環保嘅議題，但佢對尋日嘅議題似乎好有準備，致詞前已出示一本講環保嘅英文書籍，話呢本書係佢最近買嘅，內容係講述點樣節省能源，書名係《WHEN CHANGING A LIGHT BULB JUST ISN'T ENOUGH（改燈泡遠遠不夠）》，準備送畀煲呔曾參考吓。
佢話呢本書圖文並茂咁教人點樣慳能源，仲提供咗一百五十種方法添，焦點話淨係換個慳電膽只係慳得好少能源，開少啲冷氣同少用啲水慳嘅能源仲多。唔少人聽到佢嘅發言都會心微笑，呢幾句說話無疑係寸爆煲呔曾對環保嘅知識有限啦！其他議員發言時又紛紛批評煲呔曾口講重視環保，卻唔肯出席哥本哈根會議，顯示佢冇決心處理全球暖化問題，淨係識逃避責任。