政圈呢輪響起通波仔警號，繼財爺鬍鬚曾上兩個月心臟病發入院，要接受通波仔手術後，專業會議立法會議員「大舊石」石禮謙禮拜一都不適入院，即晚進行通波仔手術，前日出咗院，今次係佢九年嚟第六次做通波仔手術。正喺屋企休養嘅大舊石尋日同我哋講電話，聲線仍然有啲虛弱。
立法會尋日開大會，大舊石都冇現身，佢話希望盡快復工，以後會聽醫生話積極減肥，食少啲美食。雖然佢聲線虛弱，不過可以自己聽電話，證明情況應該冇大礙。
大舊石腹大便便，身形偏肥，佢自己講過，心血管病嘅成因包括遺傳、飲食習慣、極少運動，乜都有啲，第一次出事發生喺二○○○年九月，當時佢喺工作中忽然覺得心絞痛，入院檢查發現成條血管塞晒，第一時間開刀，大步檻過。