小白觀點：好彩高官唔叨光

唔講真係唔知，原來瑞典有個聖誕老人奧林匹克，但講你都唔信，今年嘅勝出者唔係啲一味只識講「呵呵呵」嘅北歐肥佬，竟然係一個香港仔，真係香港嘅驕傲嘞。不過最奇嘅係，點解唔見三司十二局出嚟攝位爭影相叨光，又大大聲話由此證明陀地聖誕老人唔係垃圾嘅？

好彩咋，當局做嘢周不時三分鐘熱度，逼到官大人狗急跳牆，諗到冇嘢好諗，連一年一度創造就業嘅機會都照殺，將扮聖誕老人都列為第七大優勢產業就弊囉！癲起上嚟，隨時失驚無神爭個「東亞聖誕老人運」返嚟創造傳奇一刻、豪花幾百億起條京港高速雪橇道、喺國金隔籬豎立一條高百幾層樓嘅煙囱，你話係咪大劑呢！

網友觀點...X）...

[　Ray　]

簡直係香港人嘅驕傲啦，fight低晒其他國家喎，絕對值得表揚！

[　德仔　]

原來做聖誕老人都唔易㗎，冇番咁上下魄力同過人之處都做唔到。

[　Ivy　]

「聖誕老人奧林匹克」喎，香港仲得埋獎添，點解政府冇宣傳嘅？

[　大隻蘇　]

以前覺得真正聖誕老人係好遙遠嘅事，點知原來香港人都做到，講都唔信。

網址：www.sunsiupak.blogspot.com

阿豪觀點：喺香港撈盞出醜

香港好似好耐都冇咩開心新聞，今年聖誕老人奧林匹克比賽，由一位香港人勝出，都算係香港嘅驕傲咯。呀，唔知大家自己人，向呢位聖誕老人要禮物，佢會唔會畀大份啲我哋呢可？

其實阿Jim都係喺外國做聖誕老人好喇，香港啲細路仔都冇晒童真啦，見到你盞問你現兜兜攞錢使，或者送啲K畀佢哋索，又或者掹吓你啲鬚，等你出吓醜。再講啦，聖誕老人始終係外國嘢，唔啱我哋中國人社會，提到送禮物嘅使者，中國人梗係第一時間諗起財神，又或者有求必應嘅黃大仙啦，到時聖誕老人要淪落到幫人度條必勝波馬貼士，搞到滿身銅臭味，咁就大煞風景啦！

網友觀點...X）...

[　又到聖誕　]

咁聖誕老人請唔請鹿車嘅鹿呀？邊度可以應徵？

[　客迭　]

我哋唔係一早已經有聖誕權喇咩？

[　傻仔　]

到底做聖誕老人有乜嘢特別要求呢？啲鬚係咪黐嘅呢？

[　朱標精　]

選埋晒啲鬼佬節日嘢，點解農曆新年唔搞國際財神選舉？

網址：www.lukchiho.blogspot.com