尋日係立法會主席曾鈺成同太太伍嘉敏（Carman）大婚之日，一對新人喺會展搞咗個雞尾酒會大宴各界朋友，仲請嚟前律政司司長梁愛詩主持婚禮，身為恩師嘅前資深人大吳康民就做證婚人，好多政商界朋友都畀面赴會。曾鈺成同Carman相識四十幾年，多年前兩人都喺培僑中學教書，Carman教英文，曾鈺成就教數學，當年兩人冇擦出愛火花，之後各自結婚，曾鈺成娶咗前任太太楊新兒，Carman就下嫁粵曲創作人嚴觀發，仲移民埋去加拿大；直至○四年Carman回流，兩人久別重逢擦出火花，修成正果。