「沙士英雄」兼中大逸夫書院院長沈祖堯獲推薦做中文大學新校長，尋日佢出席一個活動時，首度講到自己嘅心路歷程，話三個月前突然收到一張神聖光碟，並受碟中出埃及記嘅故事影響，啟發咗佢願意接受新挑戰。莫非沈祖堯要學摩西咁帶領中大生過紅海？
個活動名叫「喜悅之城」傳道會，由前高官馬時亨太太王培琪擔任主席嘅組織喺馬灣挪亞方舟主題公園舉辦，虔誠基督徒沈祖堯擔任嘉賓，被問到對做中大校長有乜抱負，沈祖堯強調，最重要係同各方面「有偈傾」，好似早前拆卸烽火台風波咁，如果溝通得有技巧，問題自然迎刃而解。
出席同一場活動嘅肥亨仲同沈祖堯大講家庭、事業同教育等，兩個男人講到夫妻相處之道時，不約而同話最重要係多溝通，仲夾晒嘴形話女人一定要氹喎，搞到在場嘅馬太同沈太都笑逐顏開。