扶貧交白卷，市民一於唔收貨。「東方報業民意調查」發現，大部分受訪者不滿施政報告內容，兩成八批評報告只談遠景，忽略短期紓困措施；兩成七形容報告內容空洞無新意；兩成四指商業味太重，民生措施着墨太少。另外，如果要為報告打分，三成九受訪者認為唔合格，二成四畀好低分。

其實市民何止不滿，直情係嬲到爆喇，有二百幾名基層人士仲操上政府總部抗議，狂炳煲呔曾「當窮人冇到」，並當場撕爛份報告。

又難怪市民咁嘅，現時香港貧富懸殊愈來愈犀利，有一百二十四萬窮人，十九萬個在職貧窮家庭，失業率超過百分之五。咪睇近排樓市股市升到嘭嘭聲，其實只係虛火咋，對低下階層一啲用都冇。好多打工仔喺金融海嘯期間被裁員減薪，依家仲係冇啖好食，期盼政府推出紓困措施。

點知成份報告冇糖派、冇紓困、冇扶貧、冇創造就業具體措施，唯一算得係「派糖」嘅措施，就係發一百蚊慳電膽現金券，但跟手就要加電費，直情係搵笨。叮！

煲呔曾淨係識得吹水唔抹嘴，大講未來發展方向，話要推動發展醫療服務、教育、環保、檢測及認證、創意文化及創新科技六大產業。弊就弊在，所有嘢都係十畫未有一撇，冇十年八年都睇唔到成效。對於報告淨係講六大產業，有三成受訪者話對六大產業冇信心，擔心會流於空談；兩成六批評六大產業遠水救唔到近火；兩成一質疑發展教育及醫療服務產業唔符合本港嘅實際。

叮佢個鎯鎯！難怪關注綜援檢討聯盟組織幹事李大成話，上一份施政報告已經係漠視基層市民嘅問題，呢份施政報告更加係無視低下階層困苦，各界要求政府檢討綜援，資助基層學童上網費，政府乜都冇做到。

莫講話窮人啦，就連中產人士都頂唔順。有中小型企業界人士直斥施政報告內容唔務實，冇照顧大部分市民嘅需要。成日話開展六大產業，但都係太遙遠嘅事。現時好多公司經營困難，部分打工仔被裁員減薪，基層開工不足，政府都唔理。三成七受訪者直斥政府漠視貧窮及貧富懸殊問題；兩成二指摘對弱勢社群支援不足；兩成一指施政報告關懷不足，幫唔到基層紓困。

一句講晒，施政報告不得人心，大多數市民都唔肯收貨。煲呔曾，咪以為市民鬧吓就算，依家可以話係群情激憤，如果你再唔keep your election promise扶貧紓困，一旦官逼民反，後果不堪設想。