賭王何鴻燊早前轉到養和醫院休養，進展良好，三太陳婉珍尋日到醫院探望賭王嗰陣容光煥發，被問到賭王下月八十八歲生日會有乜安排時，三太話：「咁都要睇佢OK先出得院，（應該出得院啩？）OKo架！等佢慢慢恢復，（機會大不大？）梗係有機會出到院啦！一定添！」
至於有指賭王會入高壓艙，三太喺晚上同素顏穿透視裝短褲嘅何超雲第二度去醫院時就否認：「唔係，冇嘢冇嘢！」另外，四太梁安琪一樣心情大靚，身穿紅色背心裙到醫院，夜晚離去時更主動向記者揮手。
另外，何家嘅保安尋日多次以專車送東西到養和，三太直指物件係帶畀賭王嘅，佢話：「係呀！都係平時用嗰啲嘢。」夜晚再有保安帶嚟一個LV袋、一個行李篋、一個紙袋同六盒檸檬茶。
