餐廳女東主林太形容店舖受損情況慘不忍睹，「大閘撞到凹咗、天花拱起變形，招牌爛晒，成間舖頭爛溶溶！」茶餐廳今年七月才用十多萬元裝修，林太慨嘆：「啱啱先裝修完，邊有錢再維修？諗住搵消防處傾，點知佢哋一味話冇案例，唔單止幫唔到手，仲叫我哋自己同銀行借錢！」茶餐廳每日營業額近一萬元，估計維修費連同生意損失高達數十萬元。

議員斥處理不善

協助林太的深水埗區議員鄭泳舜直指消防處處理不善，「市民間舖畀消防車撞到爛晒，政府部門係咪應該有個機制？最基本都應該派人交代個處理程序，唔係好似依家咁不聞不問！」

立法會民政事務委員會委員陳克勤則狠斥消防處缺乏人情味，有損形象及打擊市民對政府部門的信心，「就算單意外要進入法律程序，點都有責任建議人哋點去索償！」

警方發言人指有關交通意外尚在調查階段，為免妨礙日後可能進行的法律程序，暫未能就案件評論。但無論調查結果如何，涉案任何一方均可考慮向另一方作民事索償。消防處發言人則稱，警方正就意外展開調查，現階段未能作任何跟進。法律界人士謝天良表示，警方一般於交通意外發生後的四至六個月內，控告其中一方不小心駕駛，並排期審理，索償人可待審理後，向被定罪一方追討維修費及損失。