喺官場中，教育局局長孫明揚算係資深政務官，所以被視為政務司司長頭號「替工」，啱啱前兩日高官上晒北京，孫公又要署任政務司司長職務，尋日晨咁早去完灣仔金紫荊升旗禮，下午又回復局長身份到尖沙咀文化中心出席青年學生音樂會。
唔知佢冇得上京睇閱兵會唔會覺得可惜呢？佢就以一貫輕描淡寫話：「咁總要有人留喺度，留守大本營嘛！」佢仲話睇電視直播已感受到壯觀場面，同十年前親身上京睇時比較，好多嘢已經唔同晒，依家幾乎全部都係國產嘅新型武器，好多都未見過。
由於要做替工，佢仲未得閒約實兩個寶貝女聽日返屋企食飯共慶中秋節，話要過埋尋日至算喎！咁孫太會煮乜嘢拿手好餸做節呢？孫公諗一諗然後話冇乜點整嘢喇，因為平時都食得好好，咪食吓月餅應吓節囉！