小白觀點
唔做《葉問2》主角嘥晒
兩大實力派男歌手街頭肉搏,本報全程獨家一條龍詳盡直擊報道,小弟ontv睇完又睇,逐格重播,真係精彩到爆呀!只見有人嘅佛山無影腳非常到家,忽然Superman上身,建議各位歌迷可以配埋音樂一齊睇,「我的愛,這麼多,Come on……」
只見男歌手一腳伸埋去,吹咩,因為「不要管別人是否看到……我只是要全世界看到」Wow,《葉問2》唔搵呢位歌星做主角,真係嘥晒呀。話時話,兩條麻甩佬搞埋一齊,唔使水着,竟然可以成為城中熱話,確係罕見!不過正所謂動口不動手,大家斯文人嚟嘛,下次不如互吐口水算啦,畀人影到都可以話係「相濡以沫」吖嘛。
網友觀點...X)...
[阿俊]
打得幾狼死呀,曹格嗰一腳,真係男人最痛咯~~側田元氣大傷。
[傑傑]
睇埋條片仲過癮,打成咁,唔通為爭女而打,耐人尋味!
[sophia]
點道歉都無用啦,咩形象都無晒,自己係公眾人物就檢點啲啦,教壞人!
[Mandy]
明星又吸毒又打交,全部壞分子風氣,細路跟偶像有樣學樣就死咯!
網址:www.sunsiupak.blogspot.com
阿豪觀點
出唱片送「路牌」包賺
曹格鬥側田呢齣真人騷,全城哄動。事件揭發原來一般青少年好無知,如果見到班明星打交,會有樣學樣,聽日隨時帶埋開山刀返學校開片。話時話,你睇吓我哋側田哥呀,基本上無還手之力,真係慘不忍睹。好彩東亞運馬來西亞冇份參賽,否則實畀佢哋攞晒武術項目嘅金牌啦!
不過呢件事又唔係全無積極意義嘅。依家大家都話,時下嘅歌手出路愈來愈窄,收入愈來愈少,淨係靠出唱片實聽乞米。依家啱啦,兩位仁兄可以開多條求生手藝,就係做武打明星。再唔係,可以在「唱作歌手」之外,殺出一條「動作歌手」嘅血路,下一張唱片推出時可以學公仔書送兵器咁,加送模型路牌一個,包賺!
網友觀點...X)...
[匿名]
搞咩歌唱比賽,明星散打王好睇好多,爭奪格鬥天王之位!
[客迭]
有呢啲比賽我一定捧場呀,起碼拳拳到肉,即刻見真章呀,唔使好似嗰啲歌唱比賽咁,聽啲評判模棱兩可嘅評語!
[大塊田]
好彩側田冇擔任「反暴力大使」,否則又被人話教壞細路!
[Patrick Lai]
唓,你班人咁緊張,都係因為當事人係明星之嘛,實際上中環一晚都唔知有幾多單打交案件啦,又唔見你哋關心?
網址:www.lukchiho.blogspot.com