小白觀點

應禁賣針筒手術刀

依家新疆局勢立立亂，好彩有班武警大哥喺度，剿平香港班記者，打到佢哋一個二個豬頭咁，仲唔落荒而逃咩！冇計喎，鬼叫佢哋個樣唔似外國人咩，你見唔見有CNN記者畀人打吖？又見唔見有西人畀針筒拮吖？港產片《新宿事件》嘅中心思想，就係一句「中國人不打中國人」，但最過癮嘅係，成套戲由頭到尾都係中國人專打中國人。所以呢，各大傳媒真係要諗吓請番幾個外國記者坐鎮，慳唔少藥費㗎。

話說回頭，雖然新疆郁啲就攞針拮人，都未及香港醫護人員下下打錯針。不如咁啦，學國內將針筒甚至手術刀當係違禁品唔畀賣，醫生少做少錯，相信醫療失誤都少啲。

網址：www.sunsiupak.blogspot.com

網友觀……

點解你係咁

雖然新疆攞針拮人嘅針唔知有冇啲咩病毒……都好過香港行緊街畀人淋鏹水……

菲菲

香港人禍、針禍、鏹禍乜禍都有啦，多過新疆幾倍。入醫院條命仔仲凍過水。

文鴻

新疆都捉個針友出嚟頂罪吖，香港拎正牌打錯針、割錯乳房，邊有人出嚟認罪？

佳八

比起新疆，香港人都算有品，咁多單針禍都冇出過聲，連和平上街都冇，唔通真係百忍成金？

Fai

呢次真係針拮到肉至知痛，雖然遠在新疆，香港人都感同身受啦～

梁潮偉

香港「針禍」勁唔勁過新疆就唔知，但係香港冇記者採訪「針禍」而畀人打囉……

Rex Ho

唔好咁誇張啦，香港人已經視醫療失誤為日常生活一部分㗎喇！

朱標

香港唔單止有「針禍」，行出街都驚冧招牌、淋鏹水或畀大樹砸中，分分鐘危險過烏魯木齊。

阿豪觀點

拮針黨天堂冇人要孭鑊

新疆烏魯木齊家陣人心惶惶，個個聞針色變，不過香港都唔好得幾多，最近連串打錯針事件，包括初生嬰打過期卡介苗以及最近嘅「打針漏疫苗」烏龍事件……

將香港「針禍」同烏市比較絕冇誇張，大家諗深一層，烏魯木齊搵針拮漢人嘅係維吾爾族人，點都叫做有樣認吓吖，但係香港拮針黨成員都係同我哋一樣樣嘅醫護人員，令人防不勝防。

另外，新疆話晒都叫怒炒咗烏魯木齊市委書記同自治區公安廳廳長吖，仲講明要依法嚴懲拮針黨，反觀香港冇官員要為「針禍」負責，直頭係拮針黨天堂啦。

或者香港唯一優勝之處，就係冇記者因為採訪「針禍」而畀人毆打啦！

網址：www.lukchiho.blogspot.com