立法會勢力繁多，大分係建制派同泛民，細分就令人頭暈，淨係建制派都有建仔、富貴黨、工聯會、專業會議、經濟動力、五散人同詹Sir二人組等七個組合，另加五名無黨無派嘅獨立議員。勢力咁多，佢哋彼此間卻冇常規溝通機制，唔知係咪咁，兼且見到泛民飯盒會條橋都唔錯，佢哋本月底同十月中打算定期開飯溝通吓。
泛民由上屆立法會開始，每個禮拜五都會約埋一齊食飯盒吹水，最近泛民就五區總辭問題爆發內訌，其中一個原因就係飯盒會亦跟隨立法會休咗會，令佢哋少咗個進行內部溝通同協調立場嘅機會。建制派過去一年爆咗多單互相猜疑、臨陣倒戈嘅不快事件，為免成日畀對手牽住鼻子走，於是佢哋都發功。
今年七月立法會休會後，建制派首次搞咗個豪門夜宴，誠邀唔包括立法會主席在內嘅三十六名建制派議員赴會，席上有翅食又有紅酒飲，比泛民捱飯盒開會高檔得多。近日，有人再廣發請柬，邀請原班人馬喺本月底立法會大會復會前，以及十月中復會約一個禮拜後再聚多兩次，今次食乜嘢、點食法仲未有細節。兩大陣營鬥食飯溝通，顯示香港政治生態已經走向「開飯喇」模式，換個角度睇，喺飯枱上解決爭拗都未嘗唔係好事。