近日財爺鬍鬚曾等財經高官齊齊話金融海嘯已完結，香港經濟已喺隧道中見到曙光云云，但尋日喺中環遇到前財爺「阿松」梁錦松，佢對政府一味唱好有啲保留，仲叫小巿民要小心，又話︰「政府話穩定都有啲穩定，不過外圍變數大，巿民投資要審慎啲。」問佢依家忙乜？佢諗都唔諗就話︰「忙搵食！」
跟住見到行會前成員Henry范鴻齡，問佢冇辦法喺中信泰富做到退休，覺唔覺得遺憾，佢諗一諗話︰「依家最緊要係公司能夠穩步發展，一直好落去！」可見佢對公司仲好有感情。
Henry仲分析話，香港經濟係咪復甦仲存在好多變數，事實上未完全穩定下來，事關美國仍然係全球最大產品輸入國，惟經濟仍然疲弱，信貸同樓市存在嘅風險難以估計。咁市民現階段係咪適宜投資呢？佢話可以投資，亦都可以買股票，不過風高浪急，市民就要小心啲嘞！