犀利咯，如果「博派」同「狂派」一齊喺香港秋名山、觀塘首都高速大對決，驚險刺激兼而有之，外國旅客仆倒嚟睇啦，戇拚三碌拎、老鼠樂園摺硬都得！

所以呢，作「亡命小巴求生法」呢個題出嚟，都係得啖笑，做乘客嘅想保住條命，其實做唔到啲乜。除非好似Blogger阿榮所講，一上車即刻同司機調位啦！但係記住喎，錢始終都係要畀，畢竟都係乘客吖嘛，如果你係司機嘅話，咪又係一樣車神上身踩到盡，見人撞人，遇車撼車！

網友回應......

阿榮

由細到大，阿媽教落坐小巴要坐司機嗰邊，因為有事時司機本能反應一定係自己安全先嘅，但近月啲車禍好明顯係坐邊個位都死！想保命仔呀？你同司機調位啦。

小肥

嗰個車速器冇用，嘟晒都冇人理，你試吓去報警吖，拉番你轉頭，話你浪費警力添呀。

鐵甲奇俠

唔驚得咁多啦，唔通要着到鐵甲奇俠咁搭車咩。

mk

諗極唔明，乜專線小巴司機唔係打份工，月月都係出咁多糧嘅咩？唔通揸得快有獎金？

匿名

一於改裝小巴，用日本廁所抗地震防倒塌嘅物料造車身啦，安全帶就用過山車嗰啲設備，咁就點撞都唔驚啦！

晴明

試過由大埔飛亡命小巴出旺角，只係三個幾字，架車好似曉飛咁，一額汗。

阿丁

睇到單新聞真係心翳翳，晨早返工冇咗條命，唉……

阿堯

政府搞唔掂亡命小巴，公路片車又冇佢符，好心改改宣傳，叫「馬路多意外，香港冇人愛」啦。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。
網址：www.sunsiupak.blogspot.com