雷曼小組開始舉行聆訊至今已有五個月，足足有二十場。小組主席何鍾泰尋日話八月應該唔開會啦，等九月先再開工，到時估計傳召政府官員同監管機構嘅工作應該今年內會完成，然後到出年先開始傳召銀行喎。

其實被傳召過六次嘅任總，以次數計已經係眾人之冠，但佢喺五月最後一次作供嘅時候，仲有議員排緊隊未問完嘢，所以需要擇日再審，只係一直未搵到時間。拖吓拖吓搞到依家都未排到期，而距離任總十月一日卸任嘅日子又愈來愈近，換言之任總退咗休都甩唔到身，可能要繼續返立法會受審啦！即係起碼要鎖多佢三個月。

傳召銀行有排等

任總就退而不能休，佢嘅繼任人「攞命陳」陳德霖上位亦唔會好過。事關有小組委員覺得攞命陳由九六年開始做金管局副總裁，到○五年先走，而實行證券大法同雷曼迷債開始喺香港發售都係喺○三年嘅事，攞命陳冇理由置身事外㗎，小組仲醞釀喺小組委員會建議傳召攞命陳，所以佢返新工後第一樣嘢，除咗可能面對迷債苦主衝擊銀行之外，就係去立法會受審。

除咗攞命陳之外，呢位小組成員心目中嘅傳召名單，仲包括財爺鬍鬚曾同埋前財經事務及庫務局局長馬時亨，諗住一抽咁召晒佢哋去審，咁搞法怕且到出年都未必開始傳召到銀行呀！咁何鍾泰個如意算盤未必打得響嘞！