澳門第三屆行政長官選舉管理委員會尋日拍板，公布崔世安成為新一屆特首選舉唯一候選人，但佢冇因為坐定粒六做特首而放軟手腳，近日仲四出去探訪唔同機構，聽取民意。
近年澳門樓價飆升，市民無力供樓，惟有寄望政府推出多啲公屋。崔世安尋日一早就去咗台山社區中心探訪長者同小童，又同街坊面談（圖）。居民伍瑞蓮向崔世安訴苦，話仔女已到適婚年齡，但因冇錢供樓，被迫擱置成家立室嘅計劃：「要佢哋孭住供樓負擔二十幾三十年，我做母親嘅真係好心痛！」
崔世安即時安慰伍女士：「作為父母，唔使畀咁大壓力自己。後生仔肯讀書、肯對父母好，已證明你教育得好成功。」佢解釋，政府現正修改公屋法例，以致推出公屋嘅進度緩慢，不過佢就承諾等新建公屋落成後，會就各階層嘅意見，安排輪候上樓事宜，而且會特別重視單親家庭所面對嘅住屋問題。