海洋公園主席「扮嘢文」盛智文喺舊年年底暗嘲迪士尼趁金融海嘯逆市加價，嗰時佢仲好得戚咁話海洋公園入場費平，會同香港共度時艱。言猶在耳，海洋公園最近竟宣布加價兩成，前言不對後語嘅扮嘢文被輿論狂鬧，就連旅遊發展局主席田北俊尋日都喺大氣電波度話海洋公園揀呢個時勢加價唔合理。
田少話扮嘢文對加價嘅解釋太牽強，仲話海洋公園動用五十五億元增加樂園設施，但當中一半由政府畀，四分一喺儲蓄度攞出嚟，只有四分一係問銀行借，所以實質要還嘅錢唔多。
跟住佢仲明窒扮嘢文講一套做一套，未能與香港市民共度時艱，依家失業率不斷上升，而遊客數字就係咁跌，所以促海洋公園等到經濟真正復甦時先好提出加價建議。佢憤言：「海洋公園加價冇諮詢過旅發局，我都係睇新聞先知，我都打咗個突。」