恒隆集團主席陳啟宗發起嘅香港發展論壇尋日搞咗個研討會，搵咗唔同界別嘅人士討論香港喺中國崛起下嘅角色，到場嘅政界人士包括全國人大基本法委員會副主任梁愛詩、全國政協常委陳永棋同楊孫西、港區全國人大代表羅范椒芬等，但點知陳啟宗因為身體不適甩底。
咁怪異嘅安排，令人懷疑佢有意將風頭讓晒畀疑似特首參選人、行政會議召集人CY梁振英，唔通想做個順水人情，為CY登上特首之位做King Maker？
如果計劃真係咁，CY一啲都冇辜負陳啟宗嘅一片苦心，繼續成為新聞焦點。被問到最近有冇多咗人就佢參選一事畀意見，CY笑住答：「過去二十年都成日有人畀意見我㗎啦！」聽清楚未？二十年嚟都有人就佢參選特首畀意見，即係始自一九八九年。