尋日喺中環港鐵站口見到富貴黨主席Miriam劉健儀，問起有啲人建議金管局CEO要進行全球招聘，Miriam覺得最好都係請番本地人。吓？咁咪即係撐特首辦「攞命陳」陳德霖？咁又唔係。佢話就算透過全球招聘請到個國際財金猛人嚟做，都未必對香港咁熟悉啫！
咁攞命陳係咪夠資格坐呢個位先？Miriam話攞命陳以前做過金管局副總裁，但佢離開咗一段時間喎！咁又係，攞命陳曾經下海搵真銀，之後仲做咗煲呔曾嘅大內總管，相隔咁多年，未必掌握到最新嘅走勢。
商務及經濟發展局前局長馬時亨仲有個幾月就過完冷河，又透露會有新搞作，咁佢啱唔啱做金管局CEO？Miriam話肥亨以前喺財經界打滾好多年，又做過咁多年局長，做呢個位，佢都有得秤㗎！
肥亨尋日喺一個活動仍然口密，話無論做乜都好，大前提係唔會畀自己咁大壓力：「從商必定有壓力，如果要從商嘅話，倒不如留喺政府好過啦！」