本文重點
科技大學校長朱經武八月就會退任，呢排形形色色嘅餞別宴食極都食唔完，尋日輪到科大啲學生歡送佢，搞啲乜嘢花臣？咪就係接力跑囉！朱校長同常務副校長錢大康、副校長黃玉山齊齊落場跑番轉，順便為科大「撲水」，朱校長仲自揼心口捐款十萬元贊助賽跑，認真唔話得！
曾轟政府科研投資少
接力賽要求參賽者扮鬼扮馬，朱校長領軍嗰隊就以廚師Look參賽，原來佢早前喺師生面前示範用液態氮整雪糕嘅形象夠晒深入民心，今次同埋三位正副校長着住廚師衫，再配對波鞋，仲要揸住個象徵當日朱校長做嘅雪糕筒款式氣球，扮相相當搞笑。但朱校長只係落場跑咗一個圈咋！點解？佢講笑話已經上氣唔接下氣，再跑就最驚中途斷氣。唔係呀？
呢排新教學語言政策搞到滿城風雨，走埋去問朱校長點睇？佢話唔了解詳細內容，唔評論，但對三三四學制就好支持，話呢項政策對啲大學生有好處。
朱校長平時係好好先生一名，但有時都會向政府發炮，以往曾經幾度開腔批評政府對科研投資少，咁搞法只會阻礙香港嘅科研發展，而新教學語言政策好大程度會影響啲中學生嘅成績，亦對日後大學收到乜嘢水平嘅學生有好大關係，但點解提到新教學語言政策，朱校長就封晒嘴呢？
咁都唔難理解嘅，依家撐新政策嘅，就覺得對學生提升語言水平有好大益處，對學生同學校嚟講簡直係天使嚟；但反對嘅就話魔鬼細節不斷浮現，各執一詞下，搞到新政策好似天使與魔鬼混合體咁。
既然呢項政策咁具爭議性，教育界本身都拗到火紅火綠，若果未睇清楚就畀意見，容乜易表錯態，畀人鬧鑊勁㗎！睇嚟朱校長都好明解呢個道理，處身喺天使與魔鬼政策之間，都係慎言好啲，講多句不如講少句，費事惹火上身啦！