大埔水陸墟尋日舉行慶祝活動，請嚟七對夫婦着起婚紗重溫結婚滋味，行政會議成員「金刀梁」梁智鴻同鄉議局副主席張學明冒雨撐場，搞到西裝、褲腳盡濕。金刀梁「濕身」不忘搞笑，自嘲當年因荷包「冇水」，結婚時只係求其簽紙，冇搞儀式。
金刀梁認真謙，查實佢出身醫學世家，爸爸係三十年代名醫梁金齡，家有億元大宅，佢口中嘅簡單婚禮，可能豪過唔少平民百姓都未定。佢又傳授御妻心得，話最緊要做到「水乳交融」，即係無分彼此啱晒Key，千祈咪郁手郁腳打交喎。
張學明太太大爆老公係「鄉下佬」，當年結婚只行中式禮，多年後張太始終恨影婚紗相，尋日開到口向老公詐嬌，老公點頭話可以考慮吓喎。
