本文重點
旅遊超人阿Paul謝偉俊同「白姐姐」白韻琴，上月初因為「青島張茆」而情海翻波，當時白姐姐喺記者會爆料，指阿Paul同佢結婚係另有原因，為佢哋呢段二十載情留下最大問號，但事後又好似相安無事咁，一齊飛去外國度假。究竟葫蘆裏賣乜嘢藥㗎？
事隔近兩個月，阿Paul尋日喺大氣電波提及同「青島張茆」互發挑情電郵嘅桃色緋聞，指「青島張茆」其實係一位山東朋友嘅世姪女，託阿Paul幫手喺香港搵嘢做，可能女方心急來港出人頭地，所以向阿Paul又寄自拍相，又寫嘢介紹自己，佢同個女仔連面都未見過，「孔雀開屏嘅事更加係虛幻出嚟嘅」。阿Paul話唔知邊個咁大膽，將佢同「青島張茆」嘅電郵內容改頭換面，再擺上網，造謠生事。佢又承認最近做咗立法會議員，律師牌又啱啱攞番，一定係冷落咗白姐姐。
咁究竟佢同白姐姐結婚係乜嘢原因？傳聞係風水婚姻喎！阿Paul尋日終於首度開腔，揭開謎團。佢話風水婚姻係假嘅，只不過當年佢申請緊居英權，「想白姐姐都可以受惠」，於是就「喺法律上做啲手續」，當時佢連向白姐姐求婚都慳番，註冊時連結婚戒指都冇準備，仲好肯定咁話坊間流傳嗰張結婚照係假嘅。
維持「男女朋友式交往」
眾所周知，阿Paul同白姐姐年紀相差一段距離，主持人問佢哋係咪好似神鵰俠侶裏面嘅楊過同小龍女咁呀？阿Paul即刻話冇相差咁遠，白姐姐啲皮膚仲又滑又彈添！
呢對現代版楊過同小龍女，註冊後嘅生活又有乜分別呢？阿Paul話，兩人嘅關係基本不變，維持「男女朋友式交往，多過好似夫妻嘅方式」喎，仲話做二十年朋友唔簡單，希望再有好多個二十年。朋友定夫妻真係像霧又像花，撲朔迷離，就等讀者自己心領神會啦！