千億爭產案熱爆全城，案中主角陳振聰充滿神秘色彩，有啲人預測呢單官司落幕後或有電影會拍番件事，仲話有福仔之稱嘅「白花油王子」顏福偉（圖）係至佳人選，事關福仔個樣同陳振聰好相似。但福仔話冇興趣，因佢唔鍾意喺水銀燈下生活，亦冇興趣拍戲，但佢都開定後門，話如果有人捐大筆錢做善事，佢都會考慮。
已經全職從商嘅福仔尋日出席維多利亞青年商會嘅研討會，佢喺會上一再賣花讚花香，仲透露白花油嘅行銷秘方。佢話，美國人乜都要大，所以大樽裝藥油就最好賣，反而菲律賓人就鍾意細支裝，於是特別出產一點五毫克裝白花油。
講到金融海嘯應變方法，福仔話最緊要同員工同舟共濟，所以公司無裁員計劃，佢仲話，做生意最緊要有良心，搞好個形象，啲錢就會追住湧埋嚟喇！