Netflix出手百獸王六月復活

唔使唔認老，無論係「百獸王」或者「金剛戰神」，只要你當年喺亞視睇過，相信閣下至少都係「3字頭」一族了。呢部經典動畫唔只港日台大熱，仲賣到去美國，喺當地與《機甲艦隊》炒埋一碟變成《Voltron》，聽落匪夷所思，結果奇兵突出，成為少數鬼仔都睇到入晒迷嘅日系機械人動畫。咁收得，大家當然想有續集啦，可惜2011年嘅《Voltron Force》，成績大不如前，唔少Die Hard粉絲將佢當係黑歷史。不過人生滿希望，唔使頭岳岳，Netflix喺早前嘅洛杉磯Wondercon 2016動漫展上宣布，將與DreamWorks Animation合作炮製新作—《Voltron : Legendary Defender》，仲定埋喺今年6月10日首播，首季有13集，而且即場發表埋Trailer。就Trailer與官圖嚟講，DreamWorks Animation出手，畫面質素當然冇得輸，至於大家最關心嘅機設，筆者就好滿意，絕對收貨，由黑、紅、綠、藍、黃五獅合一嘅元祖特色忠實保留之餘，整體嘅機身輪廓亦都追上時代，變得流線化之餘，仲有美式動畫獨有嘅Muscle Look，成功將美、日不同嘅科幻美學共冶一爐。對於我哋呢班資深粉絲嚟講，見到呢個新設計，依然會一眼認出係百獸王；至於睇慣咗Iron Man及Captain America等Super Hero嘅小朋友，新百獸王嘅造型亦迎合到佢哋嘅審美觀，由大人到小朋友都籠絡得到，高招！計嚟計去，《Voltron : Legendary Defender》都幾難有得輸，除非劇本又好似《Voltron Force》咁樣出事，希望筆者今次做咗燈神啦！