將「宿敵」呢條橋玩得最精彩嘅動漫作品，你會揀邊部？《Batman v Superman : Dawn of Justice》係最新，但未算係最好嘅選擇，喺筆者心目中，第一位永遠係「阿寶VS馬沙/高達VS紅渣古」呢一Pair。既然早前Robot魂A.N.I.M.E.系列嘅元祖高達RX-78-2呃到唔少Like，Bandai又點會唔出埋馬沙專用渣古MS-06S Char's Custom？經典場面，立體重現，Robot魂紅渣古又交唔交足貨先？

Robot魂 MS-06S Zaku II Char’s Custom Model ver.A.N.I.M.E. 建議零售價：¥5,500

隨盒附有火箭炮專用嘅開炮特效組件，不過因為重量問題，裝咗上去，炮口好難抬得起，點解唔改用空心製作呢？

火箭炮可以一如以往掛喺腰後。

隨盒附有兩把斧頭，一把係短柄嘅「待機」形態，另一把多咗橙色嘅刃邊之餘，斧柄亦都變長，可以做到動畫中少見嘅雙手握斧甫士。

頭部內藏機關，令標誌性嘅獨眼可以左右轉動。

紅渣古都有縮胸關節，方便做出雙手揸武器嘅大動作甫士。

頸位設有隱藏式關節，大大增加咗抬頭幅度。

爆炸形嘅中彈Parts唔只可以裝喺紅渣古身上，同系嘅高達亦都用到。

高達都有嘅噴射形嘅火燄組件，紅渣古亦都照跟。

有型開炮靠縮胸

A.N.I.M.E.標榜原始美，造型盡量還原當年嘅機設特色，所以由高達到今次嘅紅渣古，造型唔似Ver.Ka咁複雜，簡樸之餘，其實身形比例與最初嘅機設相比，稍稍變得修長咗、唯美咗，呢種保持原味之中嘅小改動，我Buy！至於Robot魂一向注重嘅高可動性，紅渣古做到超額完成，唔只手肘、膝頭有雙關節，髖關節又可以大幅移前，做到飛腳怒踢高達嘅經典場面，仲有頸位設有隱藏關節，令頭部可以大幅度抬起，擺飛行甫士時，唔使再頭耷耷。除此之外，A.N.I.M.E.高達嘅一大Gimmick位，就係設有「縮胸」功能，紅渣古都做得到，左、右胸位可以向中間縮埋，再將肩關節盡量移前，就可以輕易做到雙手揸武器嘅甫士。

龍友至愛特效Parts

A.N.I.M.E.高達嘅另一Gimmick位，就係專為龍友影相而設嘅特效Parts，包括裝喺雷射槍槍嘴嘅光束組件，以及裝喺背包或者腳底噴射口嘅火燄組件。好嘢唔怕跟，紅渣古嘅特效Parts仲更加豐富，除咗有噴射形嘅火燄組件，仲有爆炸Parts，可以裝喺盾牌或者機身，甚至高達之上，扮成中彈效果，而機關槍與火箭炮亦有專用嘅開火Parts，幫龍友慳番好多PS工夫。武器方面未算驚喜，都係見慣見熟嘅機關槍、火箭炮與熱能斧，手榴彈與火箭彈等其餘嘅渣古武器，有待五月推出嘅量產型渣古MS-06先至包埋，高達迷記住到時入貨了。

查詢︰2433 1828（瑞華行）

文︰Dick

攝︰Homan、Fanny