小蟻VS山狗平價Action Cam大決戰

Action Cam愈來愈多人玩，願意使多啲錢嘅會買GoPro。如果手頭上預算唔多的話，之前好多人都會用「山狗」，依家仲有埋小米新出嘅「小蟻」可揀。兩部機睇嚟差唔多，而且都係幾百蚊貨仔，到底揀邊部先至好呢？就等達人G試過再話畀大家知。

小蟻運動相機

山狗第4代Sports Cam SJ4000

山狗（下）有埋顯示屏，機身都只係厚小蟻少少。

兩者都係用microSD記憶卡，最好用Class 10或以上拍片。

小蟻採用可拆式電池設計，有需要可以帶多塊後備電。

拍攝櫻花效果：小蟻色彩就較像真。

拍攝櫻花效果：山狗色彩拍出一片極度粉紅嘅櫻花，跟真實偏白嘅景況有好大出入。

1,080p影片截圖：小蟻拍攝範圍較闊，但亦出現變形。

1,080p影片截圖：同樣喺新宿御苑拍攝，山狗影像較利。

山狗第4代配備1.5吋屏幕，可清楚睇見操作狀態。

山狗手機應用程式介面冇乜花巧嘢，相當實用。

小蟻要靠響聲及指示燈判斷操作狀態。

小蟻手機應用程式介面設計較靚，但連接時唔穩定。

小蟻旅行套裝加送一支自拍神棍，而其他專用配件就暫時未見。

山狗第4代已跟埋防水殼，其他配件亦較齊全。

第1回合：比影像質素

牌面上小蟻運動相機話用咗Sony背照式CMOS感應器，而山狗第4代就無標明用邊款影像感應器，睇嚟小蟻好似高啲。實際應用時，非常明顯睇到兩者係有分別。達人G咁啱就拎咗去日本影櫻花，肉眼所見，其實花朵係偏白，但山狗嘅色水係非常之粉紅，好似自己事後夾硬將影像飽和度推高咗，「味精」好重手；小蟻雖然顏色淡咗些少，但就較為忠於真實。放大相片睇時，山狗鏡頭成像力真係麻麻，影像爛爛哋；相較下小蟻就較為實淨。至於拍片質素同流暢度方面，兩部機就差唔多，但係小蟻鏡頭變形比較嚴重。

小蟻Win!

第2回合：鬥操作性能

手頭上呢部山狗第4代附有1.5吋屏幕，對比無芒嘅小蟻表面上確實係着數好多，至少取景唔使靠估，即時可以睇拍攝效果。不過呢個係「先天缺陷」，咁樣比較好似唔太公平，都係一齊用Wi-Fi駁手機App較公道。山狗跟手機連接都幾穩定，雖然手機應用程式設計只係一般。另一邊廂，可能小蟻近排先出，手機應用程式設計得較全面，可以睇埋相機同手機所剩電量，可惜iOS版手機應用程式未搞掂，Android版都要靠APK形式安裝，而且內置Wi-Fi跟手機連接時好唔穩定，久唔久要重新熄機、開機再連接，次次嘥一、兩分鐘！

山狗Win!

第3回合：計周邊設備

當小米剛剛公布小蟻時，有傳聞話可以用得到GoPro啲配件；但事實係兩部機尺寸同按鍵擺位都唔同，點用呢？小蟻運動相機旅行套裝會跟支自拍神棍，除此之外就未公布會推出其他配件，暫時只適合去行山或旅行時Hea玩，想落水或者玩激烈運動就未必得。相反山狗第4代配件幾齊全，跟機就有個防水殼，去沙灘玩水都啱用，另亦有埋安裝喺單車嘅支撐架；不過要加支神棍的話，就要加個套先得。

Draw!