好彩唔係三年又三年，五年啫，本田（Honda）嘅新一代Civic Type R終於正式登場，喺上月嘅日內瓦車展舉行咗首展禮，仲唔係Concept Car，而係量產版本，據知歐洲方面最快可望於今年中發售。論樣，有邊一代Civic Type R唔囂張？今代都唔例外，不過大家最有興趣嘅，始終都係有幾多Power，仲可唔可以喺公路中逢車鎅車？

身為廠方高層兼Civic Type R嘅首席設計師，首展禮又點少得Hisayuki Yagi（左）壓場？

跑格化嘅桶椅款式，加埋靠背繡上Type R字樣，跑格盡現。

由中控台、環到座椅等，都採用紅、黑雙色配搭，實行從車廂裝潢激發車主嘅快跑意欲。

Civic Type R一向惡形惡相，第八代又點會例外？淨係睇頭燈設計已經惡到出樣。

成排儀錶都用咗紅光設計，擺明慫恿車主大大力踩油門。

儀錶板上方特設液晶顯示屏，顯示單圈計時及G-Force等「專業」資訊，似在鼓勵駕駛者到賽車場盡興一番。

據廠方表示，除咗圖中嘅Championship White，車身顏色仲有Crystal Black、Brillant Sporty Blue、Milano Red及Polished Metal四種選擇，車價方面由英鎊29,995起。

新一代Civic Type R有幾好力？唔係好誇張啫，話就話引擎係全新開發，不過規格都係見慣見熟嘅2.0L VTEC，最大馬力去到310ps囉，極速270km/h，0-100km只係5.7秒，早前仲去到紐布靈（Nurburgring）試車，以7:50:63就跑完一圈，仲快過雷諾（Renault）Megane Trophy-R，點計都係現今最快嘅前驅Hatchback量產車。同屬2.0級別，又係走街跑路線嘅豐田（Toyota）86及富士（Subaru）BRZ，佢哋嘅設計團隊唔知有冇為此事而額頭滴汗呢？

首配Turbo　同級最快

過往幾代嘅Civic Type R，由搭載1.6L引擎嘅EK9，到改用2.0L嘅FN2或FD2，都沿用自然吸氣引擎，嚟到第10代，廠方決定大革新，成為本田首款加入Turbo嘅2.0L VTEC型號，仲有直噴技術支援，唔只將馬力一舉提升至310ps，就連扭力都升到40.8kgm/2,500rpm。至於驅動及傳動方面，維持FF（前置引擎、前輪驅動）及六前速手波規格，而且增設了「+R」駕駛模式，令引擎反應變得更敏銳，唔快至奇！

動力輸出大咗咁多，底盤自然都要相應加強，新Civic Type R唔只有Brembo煞車組件，懸掛亦有針對性提升，採用全新四點式Apaptive Damper系統（避震阻力主動調整系統），令四輪懸掛可以獨立地因應路面情況進行調整，尤其是面對突然加速或減速車身重心轉移時，都可保持輪胎緊貼路面，唔怪得喺急彎多多嘅紐布靈賽道試車，都可以做出標青成績。

惡性難移　戰意車廂

提起Civic Type R，車迷難免感慨一番，除咗喺香港已經成為罕有物種，皆因喺2010年廠方一度已經宣布停產，好彩兩年後收回成命，直到去年嘅日內瓦及巴黎車展上，分別發表咗Civic Type R Concept及Concept II，車迷個心至此先至定啲，終於等到今年正式復活，仲被標榜為「街道版賽車」（Race Car For The Road）。講到咁誇，唔只要性能有交代，個Look當然都唔可以失禮，車體以五門揭背為基礎，「大包圍」當然唔少得，包括闊身嘅前擾流、誇張嘅裙腳及尾翼等，唔只夠惡，最重要係可以提升高速時嘅下壓力，而且頭泵把設有大型進氣口，輪拱上方又有導流槽，為引擎提供更多生氣，亦可改善冷卻效果。車廂方面以黑色為主，跟上一代一樣，採用高背墊設計嘅賽車桶椅，表面就有黑色麖皮及紅色縫線，承托力與戰意並重，仲有充滿挑釁味道嘅軚環、儀錶板及短行程波棍，坐得上駕駛席，都幾難忍得住唔快跑一番！