暑期旅遊出門Apps啱使
雖然旅遊指南實體書仍然有好多人會買，但論方便又點及依家一部手機在手，唔止裝得落幾百頁旅遊指南的資訊，而且仲有好多好玩的旅遊Apps幫大家組織旅程，甚或寫低旅遊日記。
《Pin Drop》
可自己「落針」製作自家的旅遊地圖。
現時仲可以為「落針」地點加入影片及聲音介紹。
《TripAdvisor Offline City Guides》
可以用手機的GPS功能在地圖上搵出最就近景點資料。
現時已收錄了歐洲、北美、中南美、中東及亞太區城市資料。
《香港國際機場航班資訊》
可即時顯示在香港國際機場升降的航班資料。
可以自行揀選各項更新設定。
《App in the Air》
應用程式會提示登機及Check-in等資料，十分實用。
航班資料一目了然，行程有晒預算。
《Day One》
介面設計簡潔又方便閱讀。
相簿設計同樣美觀。
《Wunderlist─To-Do & Task List》
加入待辦事項到清單上，可減低帶漏東西的煩惱。
可以跟朋友分享清單內容。
《Pin Drop》旅遊地圖落針
有時同朋友分享旅遊經歷，尤其係一啲比較隱蔽、冷門、而嗰本「閃閃旅遊書」都冇講過嘅景點時，真係幾轉折。透過《Pin Drop》這個應用程式就簡單得多，只要用GPS定位，直接在地圖上「落針」就可指出地點，簡簡單單即可以同朋友分享，一開手機就知道喺邊度。當然大家亦可用Pin功能製作個人推介景點地圖，例如指出抵食好味的餐廳、Shopping血拼地點等等。此程式支援社交功能，仲可以睇到其他旅人嘅推介；此外，現時仲可以在「落針」地點加入多個影片檔甚至是聲音檔案，都幾多玩法。
INFO
平台：iOS、Andrid
下載費用：免費
《TripAdvisor Offline City Guides》離線權威旅遊指南
唔少鍾意自己尋幽探秘的旅行家，都會揀《Lonely Planet》實體書或電子版。不過好多時旅遊書的資料都係作者單方面的意見，相對下，由世界各地遊客畀意見的《TripAdvisor》就更加全面。現時去到世界各地旅遊點，都可能會見到《TripAdvisor》推介的餐廳或酒店之類；不過手機版《TripAdvisor》要上網連線先用得，反觀《TripAdvisor Offline City Guides》就係離線的城市指南，仲可對應手機上的GPS功能，幫大家搵最就近的餐廳及景點。暫時這個離線版旅遊指南收錄了幾十個城市資料，美國最多，歐洲都有十幾個城市，亞太區就有八個，東京、北京、台北、首爾以至香港都有，不如睇下有冇大家想去的旅遊點？
INFO
平台：iOS、Android
下載費用：免費
《香港國際機場航班資訊》空管無有怕
未天光就起身搭的士趕去機場搭飛機，點知去到先知班機Delay兩個鐘，真係火都嚟！其實只要裝這個機場App，就可以睇到即時抵港同離港客機的資料，明知Delay的話，就可以Hea住去，尤其北上隨時遇上航空管制，的確大派用場。這個應用程式另設付費版，但不同之處在於只是加入抵港、離港的貨機起降資料，一般旅客根本不會用！
INFO
平台：iOS
下載費用：免費（LITE版）
《App in the Air》免費機場通
其實《App in the Air》不妨改名為「Apps」in the Air，那就更名符其實了，因為這一個App內已包含多個元素，而且可免費下載。應用程式內除可以獲取航班、航空公司以至機場的最新官方訊息外，亦可從中得到旅客的建議，例如機場邊度有美食、邊度有無線網絡、邊度可以打發時間等。另外，應用程式內還加入行李及待辦事項列表，以及管理個人飛行里程、到訪機場及國家統計數據等資料。
INFO
平台：iOS、Android
下載費用：免費
《Day One》攞獎旅遊日記
好多人都會寫旅遊日記，但要開電腦打段又多相又多字的Blog其實都幾費時失事，倒不如用這個《Day One》記低。這個App設計得又簡潔又靚，仲拎過設計獎；使用上可加入密碼保護私隱，有「艷遇」想記低都唔怕畀其他人偷睇得到，而且應用程式仲會自動幫你記低影相及寫遊記時的GPS位置、溫度等資料，用埋iPhone 5s可以計埋你行咗幾多步，功能好全面。
INFO
平台：iOS
下載費用：$38
《Wunderlist─To-Do & Task List》唔怕帶漏嘢
一大班人去旅行就以為好放心唔會帶漏嘢？經驗話畀大家聽，此諗法都係一廂情願。如用呢個App，就可以幫大家列定清單，提示你帶齊嘢。此App除可以跟自己唔同設備同步待辦事項之餘，亦可以輕鬆跟同事、朋友及家人分享清單，互相提點就唔怕帶漏。這應用程式另有Pro版本，可以加相片、電子表格、PDF及影片等，不過就要畀4.99美元月費或49.99美元年費，但實在太貴了！
INFO
平台：iOS、Android
下載費用：免費
