日韓機王火併Sony Xperia Z2 vs LG G3

有新款大牌手機抵港，達人G當然唔會錯過！五月尾LG發表新作G3，轉頭韓國水貨經已有售，達人G梗係拿拿聲衝去試玩；咁啱手上仲有部香港推出冇耐嘅日本代表Sony Xperia Z2，無論規格、定位甚至售價都激似。究竟邊部勁揪啲，即刻比較吓就自有分曉！

Sony Xperia Z2 $5,998（a）

LG G3 $5,380（b）

播《變形金剛：殲滅世紀》YouTube預告片，Z2屏幕色水自然，亮度及可視角度都唔錯。

用G3播同一片段，肉眼睇效果同Z2分別不大，不過細心留意就會發現黑位較有層次，明顯細緻啲。

Z2機側有實體快門鍵，半按對焦夠準確。

Z2備有AR效果、Timeshift Video等拍攝模式，玩味十足。

G3機背鍵可以充當快門，不過冇半按功能，打橫影相時用呢粒掣亦唔就手。

G3拍攝模式比較簡單，僅得魔術對焦、HDR等功能，但勝在對焦夠快。

Z2支援防水標準，記憶卡、microUSB等插口都有保護蓋，唔怕入塵入水。

G3拆殼後就可以換電，跟機仲有兩枚電池，續航力極強。

第1回合：鬥屏幕質素：LG G3 Win！

Xperia Z2有個5.2吋高清芒，仲有Live Colour LED、TRILUMINOS、X-Reality等獨家技術，顯示效果唔錯！可惜卻輸畀G3，皆因G3係第一部備有2K屏幕嘅大廠機，解像度高達2,560×1,440，像素密度有成538ppi，講數據贏晒！坦白講，肉眼睇兩機顯示質素分別唔大，要哄埋先見到G3畫面細緻啲；另外G3用上窄邊框設計，雖然屏幕有5.5吋，不過機身體積其實同Z2差不多。

第2回合：鬥拍攝能力：Draw！

Z2嘅2,070萬像素鏡頭好似勝過G3嘅1,300萬像素；不過玩開相機都知，像素高唔代表相質高。達人G試拍後，再將相片用電腦放大至100%，發現兩者相片質素差唔多，玩Snapshots絕對夠班，而Z2像素高就方便沖印大相。講到拍攝過程，Z2機側有實體快門鍵，又支援半按對焦，影相冇咁易手震；G3就可以用機背Rear Key當快門鍵，不過就冇得半按對焦，最正係支援雷射對焦技術，可以利用雷射光線探測物件距離，從而加快對焦速度，實測的確比Z2快。

第3回合：鬥規格擴充：Draw！

Z2同水貨G3都用上Qualcomm Snapdragon 801四核處理器加3GB RAM，可以話係現時最強，打機、煲劇甚至MultiTasking都超順暢唔窒機。講到電池續航力，Z2雖然內置3,200mAh大電，不過機身玩一體成型冇得換電就麻煩啲；相比之下，G3雖然電池容量得3,000mAh，但方便在可以隨時拆殼換電，加上韓版水貨跟機有兩電一叉座，出街唔使帶「尿袋」。