平玩S Pen！六核Note 3 Neo

數當今Phablet界機王，Galaxy Note 3必定榜上有名，可惜推出至今售價依然高企，唔係人人捨得買！有見及此，Samsung為其推出抵玩版Note 3 Neo，雖然規格、功能有所降階，但就平多一千蚊，並保留系列最大賣點S Pen，若之前未入手的話，今次不妨諗諗！

Note 3 Neo $4,798

對應Multi-Windows，可邊上網邊睇片。

《SketchBook》有不同筆頭及顏色選擇，繪畫效果逼真。

提供美肌、全景及有聲短片等拍攝「分唇」。

六顆核心只在運行大食程式時才全部開動，閒置時只會開啟四顆。

預載Android 4.3智能系統，提供七版首頁，撥頁流暢。

背蓋加入了仿皮花紋，增添貴氣。

僅厚8.6mm，配合微彎機背，手感不俗！

電池容積稍減至3,100mAh，但續航時間反而更長。

保留S Pen，並可插於機底。

繼續專業玩味不減

Note 3之所以能夠大賣，外形是關鍵之一。因此Note 3 Neo個樣無咩大改，沿用直板機身設計，並保留背蓋的仿皮花紋，整體感覺依然專業。外觀最大分別是縮了水，屏幕降至5.5吋720p質素，連帶機身長闊亦縮短了，加上重量減至162.5g，拎上手比Note 3輕巧，更適合女士使用。鏡頭是另一降級之處，由1,300萬像素降至800萬，並抽走了前後鏡拍攝等非常用功能，但實用功能如聲音相片、戲劇效果等則繼續保留，影相玩味不比上代遜色。

保留S Pen 素描都得

既然是「Note」家族一員，隨機S Pen當然唔少得，就操作而言，流暢度跟Note 3一樣爽快，並同樣對應Air Command功能，筆頭離屏幕少許時按筆桿指令掣，更可開啟記事Action Memo、剪貼Scrapbook及擷圖Screen Write等不同功能。另外，手機更預載了由Autodesk推出的《SketchBook》專業繪圖程式，提供大量筆頭、色盤及粗幼選擇，實測見鉛筆效果極為逼真，用來畫素描都仲得！

六核處理電量微跌

系統方面，行的是Android 4.3而不是最新的KitKat，幸好根據以往經驗，不久後就會提供更新，用戶毋須擔心。處理器是此機另一驚喜，事關既非四核心也非雙核心，而是將兩者融合起來的六核心，前者在系統閒置時使用，後者則在應付大食程式時一併開啟。以《AnTuTu》跑分所見，它的整體效能比Note 3低，但3D處理能力則較好，正是各有千秋！特別一提，此機的電池減至3,100mAh，但由於各項裝置皆無咁食電，因此3G及4G備用時間更比Note 3長了百多小時！