至索女特務HT Black Widow

扮靚係女士嘅終生事業，就算起跑線已經贏人幾條街嘅Scarlett Johansson喺身懷六甲前都唔敢鬆懈，《Captain American︰The Winter Soldier》（簡稱《CA2》）四月頭先上畫，不過由電影海報到預告短片，都睇得出Scarlett成個瘦晒，即使有PS之嫌，都難以否認新版Black Widow比起《The Avengers》版本更加Fit。Scarlett如何收身成功，筆者不得而知，不過就八到Hot Toys嘅瘦身伎倆，原來都幾出人意表。

HT MMS239《Captain American : The Winter Soldier》
圖中所見仍屬試辦原型，與最後完成品或有若干分別。

《Lost in Translation》嘅Scarlett（上）只有19歲，明顯仲有Baby Fat，依家《CA2》嘅Black Widow就完全唔同晒，難怪愈嚟愈多人封佢做女神。

素體大致沿用《The Avengers》版本，不過新制服嘅剪裁變得更貼身，唔只冇晒拜拜肉，仲有黃蜂腰，加倍凸顯Scarlett嘅玲瓏曲線。

新版Black Widow頭雕，繼續由HT嘅鑽石組合—Yulli及JC. Hong分別負責雕工及塗裝，至於服裝部分就交由Hai Lim操刀。

貼身制服以四種唔同物料縫製而成，留意衫身表面嘅直間紋理，仲用咗滴膠製成，夠晒心機。

子彈形手鐲及造型手掌，除咗有正常形態（上），仲可以換上模仿電擊效果嘅特製款式。

身為特務，當然要隨時On Call，隨盒就有智能手機，仲係弧形機身，夠In！

唔只套衫，長Boot都係100%重新製作，鬆糕踭呢個細節位都跟到足。

因應電影嘅人物設計，Black Widow嘅常用武器就只有兩把Glock 26手槍，猶幸槍膛可以後移外，彈匣又可以拆落嚟。

收身成功靠衣裝

HT會出《CA2》Action Figure，早就通晒天，由Scarlett飾演嘅Black Widow作為第一女主角，當然係必出Item，如今仲爬過男主角頭率先推出，亦都係繼《Iron Man 2》及《The Avengers》之後，第三度炮製Black Widow嘅1/6 Action Figure。平心而論，《The Avengers》版本嘅完成度已經好高，將《Iron Man 2》上圍太誇張，兼有大龍躉嘅毛病完全修正過嚟，似番晒真人嘅玲瓏曲線；至於最新嘅《CA2》版本，唔只有黃蜂腰，就連四肢都好似修長咗，唔通HT換咗新素體？真相係素體大致上沿用《The Avengers》版本，不過成套戰衣都係重新設計，唔只用料更薄，仲係由四種唔同物料縫製而成，當中包括仿皮及尼龍，藉此模仿戲服中嘅多重質感，而且更加貼身，更大程度將素體嘅誘人曲線Show-off出嚟。

新髮型疑似玩Highlight

Scarlett 10歲已經進身大銀幕，2003年更憑住《Lost in Translation》而一鳴驚人，自此成為荷里活嘅一線阿姐。不經不覺，這位紅星已經29歲了，雖則依然樣靚身材正，不過面上難免有歲月嘅痕迹。今次嘅Black Widow頭雕唔只因應收身成功而削尖下巴，膚色紋理亦有較為重手嘅「塗裝」，切合Scarlett日漸濃厚嘅成熟美。除此之外，為咗凸顯女性嘅嫵媚，HT三款Black Widow嘅髮型都係用織髮製作，不過賣相各有特色，《Iron Man 2》又長又鬈，《The Avengers》就係微曲嘅One Length頭，再到《CA2》變成又長又直，更有女人味之餘，細看之下就會發現層次感更強，亦都更有光澤，事關新髮型係由紅、啡等多種深色纖維編織而成，好似去完Salon做Highlight，唔再係之前兩個版本嘅單色設計。或者你會擔心織髮難打理，今次又長咗咁多，點算好？Don't Worry，首先直髮嘅走樣程度，比曲髮細好多，HT更教路若然有毛燥現象，只需濕少少水就梳得番直，唔算難打理啫！