射擊遊戲Fans真係有排忙！《Call of Duty：Ghosts》下星期開賣，旗鼓相當的另一大作《Battlefield 4》就真係剛剛上架，搶飲頭啖湯。由三月正式公布以來，《Battlefield 4》雖然每一波宣傳都只滲出少量新料，不過無論係洛杉磯高速公路激戰、上海圍城到中俄兩軍於西沙群島交戰，每一幕都令玩家腎上腺素急升。而透過新開發的Levolution機制，每場戰役都會因應動態環境轉變而微調作戰策略，臨場感十足！

指揮官模式要對戰場地圖下指令，似玩RTS遊戲。

Levolution機制強調與大環境互動，如炸塌一幢大樓將會令地形產生重大變化。

《Battlefield 4》的武器可容許多方面改裝。

戰場設計豐富，有城市戰、海戰、搶灘戰、空戰到叢林戰都有。

在Frostbrite 3遊戲引擎加持下，光源以至自然環境的變化都做得極真實。

單人模式「Angry Sea」中要在快被擊沉的航空母艦上戰鬥，驚險萬分。

在西沙群島上打殲滅戰，要鬥快搶奪炸彈炸毀對方據點。

高速海戰是今集其一大賣點，搭住橡皮艇搶灘實在好易暈船浪。

激戰上海、西沙十版圖

EA為咗令玩家可於試玩時體驗完美的線上對戰，所以一口氣擺64部主機，玩32人對32人！六月美國E3時就係咁樣試玩「Siege of Shanghai」上海激戰，到八月德國Gamescom就改玩「Paracel Storm」多人模式，中俄兩軍在西沙群島空降及搶灘，鬥快搵炸彈，炸毀對方據點，兩次都搞得玩家血脈沸騰。除了以上兩塊地圖外，另亦有「Lancang Dam」及「Rogue Transmission」等其他八幅地圖，而由於今集主要參戰國家為美國、俄羅斯及中國，好多中國軍備亦將會在遊戲中登場，如新款殲20威龍戰鬥機、99式坦克等，都幾有新鮮感。

新引擎環境表現極致

今集《Battlefield 4》在Frostbrite 3遊戲引擎加持下，畫面靚得誇張，尤其在單人模式「Angry Sea」時，在快將被擊沉的航空母艦上戰鬥，以及「Paracel Storm」中坐小艇搶灘的水花表現都靚得令人瞠目結舌！這類型高速海戰玩法都是今集才加入，風高浪急，加上敵人隨時殺到，易暈船浪的玩家最好事先食定暈浪丸。Frostbrite 3遊戲引擎令波浪、水花效果超像真，各方面的環境變化亦模擬得極自然，如風吹過樹林所產生的波動，及爆炸時所產生的氣流都真實到不得了。

每場戰役獨一無二

《Battlefield 4》今集還加入新創、名為Levolution的機制，每場戰役都會引入各種動態環境產生互動，例如可以炸毀整幢高樓，從而改變戰場地貌，營造有利藏身或狙擊敵軍的位置，或切斷建築物內的電源，令對方摸黑搵路等等。由於有大量動態變化組合，每場戰役的環境因而都會有所不同，每次玩都是新挑戰，要識得執生先有機會打贏仗。今集遊戲尚有一項「新設計」，就是重新引進《Battlefield 2》的指揮官模式，對戰雙方的指揮官不需要親身落戰場，但就要在戰情室利用手掣或平板，為戰場上的同伴提供情報及物資，雖然不及落場刺激，但就好考腦筋，原來幕後玩家唔易做！

INFO

類型：射擊

開發：EA DICE

平台：PS3、Xbox 360

推出日期：剛推出

售價：$449

查詢：2359 7998