唔少人鍾情玩即影即有，當中Fujifilm Instax系列就有不少擁躉。近日推出的全新Instax mini 90，便一改以往形象，以Fujifilm的復古風格出招，唔單止個樣夠煞食，仲引入了雙重曝光、B快門、微距拍攝等全新功能，既有外形又有內涵，就算唔係發燒友都會一試愛上。

Fujifilm Instax mini 90$1,580（九月下旬推出）

試相
由廠方提供的試相可見使用新加入的B快門後，可在鬧市拍攝晚上汽車行駛時所營造的車軌，玩味爆燈，而且色水相當豐富。

正面和機側均設有快門掣，以便直度或橫度拍攝。

背面提供多個按鍵和模式選擇，而顯示屏中的「B」代表支援B快門功能，最長曝光可達十秒。

鏡頭的外圍備有Mode操作環，無需按鍵都能切換拍攝模式。

用上60mm鏡頭，開機後會自動彈出，唔使手動抽出。

光學觀景器取景唔會再有偏差，而且閃光燈的輸出也夠準確。

採用NP-45A鋰電池，大約可拍攝十盒菲林，即是100張相片左右，算係耐用。

今次mini 90以「Neo Classic」作賣點，當中Neo是指夠潮，而Classic當然代表復古。先講講外形，mini 90採用磨沙銀色配上黑色仿皮，模仿舊式菲林相機的古樸歐陸風味，完全擺脫了Instax系列以往的可愛Feel，令整體風格男性向。至於新功能方面，mini 90特別加入了雙重曝光功能（Double Exposure），能夠在同一格菲林中按下兩次快門，以浮現出重疊的影像；還有新增了B快門（Bulb），其實即是打開快門保持最長十秒狀態，縱使唔係無限時間曝光，但十秒已足夠玩長曝，可以拍攝車軌、Light Painting等效果。mini 90更備有微距模式，其最近對焦距離為0.3米，除了方便影細小物件外，以後拎住部機自拍都唔怕Out Focus。

鋰電池長拍100張

作為Fujifilm最頂級的即影即有相機，mini 90在多方面都照顧到用家的需要，例如機身正面和機側都設有快門掣，橫度或直度拍攝都方便就手；另亦改用了NP-45A鋰電池，大約能夠拍攝十盒菲林，亦即是100張相片，襟過AA電。機背的液晶體屏幕，不單能顯示菲林餘量，仲可以顯示當前的拍攝模式，用家可以透過「Mode」鍵，又或者扭一扭鏡頭外圍的操作環調校，夠晒User Friendly。

SPEC

等效焦距：60mm

體積：113.4×91.9×57.2mm

重量：296g

查詢：2406 3225