雙重揸法 BMW M6 Gran Coupe

近年唔少一手樓盤都有車位不足嘅問題，部分豪宅嘅單位與車位比例更低於四比一，對於閒閒哋都有一、兩部車嘅富裕一族嚟講，其實都幾唔方便。想出多部車？唔該諗掂車位先講。最近寶馬（BMW）引入嘅M6 Gran Coupe，賣點唔只係560hp馬力，以及4.2秒就完成0-100km/h，而且擁有雙重性格，既有一般房車嘅四門五座位設計，又有跑車化嘅性能及操控屬性，一部車兩種玩法，唔使愁唔夠車位啦！

M6 Gran Coupe身兼兩職都同樣稱職，就算身價高達$2,078,000，計落其實好划算。

引擎嘅低轉扭力非常澎湃，輕輕畀油已經飆住去。

豪華與跑格並重嘅車廂布局，難怪M系一直深得車迷歡心。

尾喉採用左右四出式設計，一睇就知唔好惹。

鑽孔煞車碟加埋大型卡鉗，制動效能當然唔講得笑。

鬼面罩欄柵採用孖條式設計，造型分外隆重。

車尾置物量多達460L，足以容納大型行李。

車頂用碳纖複合材料（CFRP）打造，輕量化效果特別高。

軸距比M6 Coupe多咗113mm，後排空間就更加見使。

波箱屬於七前速雙離合器規格，轉波速度快得驚人。

一入後波，車尾嘅廠徽就會自動揭起，啟動微型鏡頭；至於前輪拱前方都有微型鏡頭，無論車尾以至車頭兩側狀況，都會即時傳送到中控台嘅大型屏幕。

影片：http://youtu.be/2ftbcg1soLc

Bernard Gallacher

連同Coupe及Convertible，M6目前已經有三個車款，論空間與實用性，Gran Coupe係三者中最理想的，既有四門布局，軸距更長達2,968mm，比起M6 Coupe足足多咗113mm，乘坐質素好比大型房車。雖然M6 Gran Coupe屬於四門五座位車款，不過貴為BMW M系成員，當然要惡形惡相先得，除咗換上跑化包圍，仲換埋20"雙柱式M輕量化鋁圈、左右四出排氣尾管及碳纖複合材料（CFRP）車頂，賣相比標準版「辣」得多，車身又噴埋Cool爆嘅啞面淺藍色，真係型到冇朋友！

大馬力唔大食

掛上M系牌頭嘅6系Gran Coupe，性能絕對唔嘢小，頭冚底下係4.4L V8 M TwinPower Turbo引擎，導入VALVETRONIC、Double-Vanos及高精準燃油直噴技術，1,500-5,750rpm就有69.3kgm最大扭力，只要稍稍加大油門深度，身體已被一股無形力推向椅背，感覺就似坐喺一隻飢餓嘅猛獸背上，只要啟動「獵捕」Mode，任何獵物都難以逃出生天。廠方指出M6 Gran Coupe嘅0-100km/h

只需4.2秒，極速去到250km/h，如果裝埋M Driver's Package，仲可以升高至305km/h，根本就係一隻披住羊皮嘅狼。另一方面，近年廠方投放唔少資源開發節能科技，喺不減性能嘅大前提下，打造更節能嘅車款，M6 Gran Coupe嘅平均油耗亦只係9.9L/100km（以EU Test Cycle計算），每公里嘅二氧化碳排放量亦只有232g。

個掣性格急轉彎

為咗提升彎路性能及循迹性，M6 Gran Coupe嘅後軸裝咗主動式M差速器（Active M Differential），與動態穩定系統（DSC）相連，系統會根據車身動態、油門幅度、輪胎轉速等數據，決定左右後輪嘅動力分配，就算車速唔慢、車身又有5m長，攻彎依然精準靈活，寶馬嘅底盤調校功力，唔到你唔服。另一方面，車上唔少地方都可以進行個人化設定，譬如引擎表現、懸掛軟硬、軚環轉向輔助力度以至M DCT Drivelogic波箱嘅換檔程序，都可各自調校並加以儲存，軚環上嘅「M1」及「M2」鍵代表兩組記憶，若果分別設定為最舒適及最運動化，駕駛者只要撳一個掣，行車性格就會即時180°改變。

舒適度交足貨

M6 Gran Coupe唔係只求速度、懶理乘坐感受嘅純種跑車，仍然會顧及實用機能，除咗懸掛有良好嘅吸震效能，車廂布局、座椅設計同樣細心，走入車廂，就會Feel到整個室內氣氛都非常運動化，車頂內裏用咗Alcantara物料包裹，軚環又以紅、藍雙色線縫製；筆者本來對乘坐舒適性唔敢有好大要求，不過坐上嗰張座墊厚度十足嘅真皮座椅後，都係要讚一讚，唔只好Feel，仲有好出色嘅包覆效果，但又唔會好似賽車Bucket Seat咁硬橋硬馬，舒適得嚟又可以固定身軀。M6 Gran Coupe兼顧到性能與實用性，自己揸當然爽，出席飲宴搵司機接送亦同樣夠體面，先將屋苑車位不足或老婆反對呢啲理由擺埋一邊，若果只係畀你買一部車，M6 Gran Coupe可會係你嗰杯茶？

飄移82.52km

有啲停車場嘅設計真係好討厭，由入口駛到泊車樓層，要轉幾個大圈先到，轉到一半已經頭暈。不過，呢個世界就係有人唔怕暈，BMW Performance Center嘅導師Johan Schwartz，早前喺美國南卡羅萊納州嘅賽道上，駕駛一部原裝M5連續飄移82.52km，計落有成322.5個圈，聽見都暈得一陣陣。呢次行動創下新嘅飄移健力士世界紀錄，並且籌到兩萬美元做慈善用途，暈大浪都抵啦！

高球超新星

寶馬喺全球贊助咗唔少高水平嘅體育活動，好似早前喺英國Surrey Wentworth Club舉行嘅BMW PGA錦標賽，就係其中一項國際知名嘅高爾夫球賽事。今年賽事焦點落喺一位只有20歲零37天嘅意大利球手Matteo Manasseo身上，佢喺附加洞力壓Simon Khan及Marc Warren，贏得賽事冠軍，打破1969年由Bernard Gallacher以20歲97天創下嘅紀錄，成為賽事史上最年輕嘅冠軍球手。