日本CP+直擊Nikon 800mm巨炮坐鎮
剛在日本橫濱舉行的相機界年度大騷CP+ 2013，各個品牌都傾力展出全新作，當中Nikon的新品數量可以稱得上係歷屆之冠，包括兩支全新鏡頭以及超過十部DC。除此之外，場內仲有多個展區讓公眾試玩。事不宜遲，立即送上會場實錄，等大家親身感受一下新品吸引力。
史上最長AF鏡頭AF-S Nikkor 800mm F5.6E FL ED VR加TC800-1.25 E ED
Nikon是次CP+以全新AF-S Nikkor 800mm F5.6E FL ED VR超遠攝鏡頭作主打，還設有專區給公眾試用，感受一下超壓縮的效果。這支兼容FX全片幅格式的新鏡，其800mm超長焦距適用於運動攝影或拍攝雀鳥等生態題材，而且支援四級VR防震以減輕震動。另一大賣點，是能夠加裝專為鏡頭而設的AF-S Teleconverter TC800-1.25 E ED增距鏡，將焦距提升1.25倍，變為1,000mm，而光圈亦會縮細至F7.1，成為史上焦距最長的AF鏡頭。此外，鏡頭內置的螢石組件可大幅降低重量，鏡身僅重4,590g，大致跟600mm F4鏡頭相若。
大眾化超廣角AF-S Nikkor 18~35mm F3.5~4.5 G ED
除了800mm這支大炮外，Nikon還發布了AF-S Nikkor 18-35mm F3.5-4.5 G ED超廣角變焦鏡頭，為拍友在14~42mm和16~35mm之間提供多一個選擇，估計售價應屬經濟實惠之列。鏡頭的近拍距離為0.28米，能夠在有限的空間拍攝廣闊的效果，加上內置SWM寧靜波動馬達，對焦時不會發出過大聲浪。鏡頭設計輕巧，僅重385g，令攜帶更加便利，成像亦令人期待。
高倍變焦大小長炮CoolPix P520、S9500、S9400
眾多新產品中，也有多部高倍變焦DC，當中變焦能力最強的CoolPix P520長炮機，配備了24~1,000mm的42倍變焦鏡頭，超廣角及超遠攝能力兼備，亦當然唔少得有VR防震系統，還加入了動態模式，無論影相或者拍片都可以保持穩定。擁有黑色和紅色機身的P520具備1,800萬像素，並設有3.2吋91萬像素的側揭式屏幕，而機頂亦有GPS全球定位系統，就算去到邊都可以清晰記錄位置。配合外置的WU-1a無線行動裝置，甚至能夠遙控拍攝和傳送至智能裝置，以便即時分享。
至於小長炮代表就有CoolPix S9500及S9400，纖薄輕巧的機身收藏了一支高倍變焦鏡，前者唔單止擁有22倍高倍變焦，更植入了Wi-Fi和GPS功能；而後者亦有18倍光學變焦。
三防孖寶CoolPix AW110、S31
縱使依家仲係冬天，但係Nikon已經率先展出CoolPix AW110和S31兩部三防相機。兩者相比之下，有黑、銀、橙、藍和迷彩五種顏色選擇的AW110整體規格和三防能力皆比較強，能夠做到18米防水，防撞方面可抵受兩米高的撞擊力，還有-10℃防寒能力，而GPS和Wi-Fi等戶外必備功能亦有齊。至於簡單易用的S31的三防能力也不錯，擁有五米防水、1.2米防撞及-10℃防寒，而且機身用色搶眼鮮明，好適合家庭使用，又或者畀小朋友學影相，至少濕水或唔小心跌落地都依然能正常操作。
入門有長短L820、L28、L27
為了顧及到入門用家的需要，同場亦見有定位入門的L系列，包括L820長炮機，以及L28和L27機仔。講到明是入門級，當然以簡易操控做賣點，當中L820就擁有22.5mm超廣角焦段，並提供30倍光學變焦，拍攝遠景和近景都冇難度，以入門機來說規格夠晒用。至於外形幾乎一樣的L28和L27，雖然沒有特別強勁的規格，但兩機都配備了26~130mm的五倍變焦鏡頭，而兩者的差異在於L28提供2,000萬像素，L27則內置1,600萬像素，足夠拍攝生活照。
800mm鏡頭唔算大支，至於重量則跟600mm差不多。
鏡頭可加裝專用的1.25倍增距鏡，令焦距擴展至1,000mm。
旁邊設有一組功能鍵，包括對焦模式、對焦距離、VR防震等長鏡必備功能。
鏡頭的中間位置可以安裝濾鏡。
會場設有「操炮區」，供訪客試玩800mm新鏡，不過就大排長龍，小記輪候了15分鐘先有得玩。
新鏡18~35mm為廣角變焦鏡頭增添新選擇。
P520算係新機中最有睇頭的一部，勝在變焦能力夠強。
P520的機頂內置了GPS定位系統，去旅行可精準確定坐標。
擁有42倍變焦的P520，鏡頭伸盡至1,000mm都唔算好長。
S9500外觀跟S9400幾乎一樣，分別在於鏡頭的變焦倍率。
估唔到S9500機仔細細，竟可以容納一支22倍變焦鏡。
高階三防機AW110，可深潛達18米，還有五種機身顏色任揀。
S31主打簡單易用，並提供基本的三防能力，去戶外玩最啱數。
入門級的L系列新品，包括卡片型的L28（左）和天涯機L820（右）。
會場花絮：
詢問處長駐精通日文和英文的靚女工作人員，非常耐心解答問題。
展覽總會有鏡頭大晒冷，原來Nikkor鏡頭已生產了7,500萬支。
有兩位工作人員專責派發Nikon Image Space的宣傳單張，看來廠方相當重視這項相片雲端服務。
這展區可以讓訪客體驗D800和D600的高畫質，仲有模特兒同綠油油的背景供各位試細位。
另一個展區就安排了舞蹈員大跳Hip Hop，試試Nikon 1的高速自動對焦有多高效率。
場內設有親子拍攝工作坊，讓父母帶同小朋友一齊參與。
代言人木村拓哉雖然冇到場，但四周可見有佢靚仔樣的宣傳品，仲狂播木村的宣傳短片。
每位工作人員都有超級迷你相機仔S01掛頸，當有人影相時就即刻展示。
Nikon邀請了專業攝影師到場分享心得，在場人士都聽得津津有味。