《Anipang for Kakao》全韓熱爆Puzzle

近排有去過韓國旅遊嘅朋友，不難發現地鐵同巴士上個個都低頭喪玩，原來佢哋都係被《Anipang for Kakao》所迷倒。呢隻遊戲玩法其實同《Bejeweled Blitz》一樣，都係三個或以上嘅同樣圖案拼埋，每局只得60秒，好刺激，仲可以同朋友鬥高分，得分榜每星期更新一次。最唔同係用上得意嘅動物卡通做主題，此外亦可以送心心畀人，等朋友可以玩多局，好互動。早前更新嘅版本就新增埋道具，例如更快嘅提示、延長時間等等。不過要留意，玩呢隻遊戲之前，一定要免費登記KaKao Talk帳戶。

系統：Android 2.2、iOS 4.0以上

下載費用：免費

《Swing Shot》猴子飛蕉

擺明向《Angry Birds》致敬，不過換上可愛小猴子，掛喺樹上攻擊對面樹嘅對手；武器仲多籮籮，石頭、果實同回力鏢都有。留意攻守互片時，會有超慢動作重播兼Close Up，睇住佢哋嘅生動表情都幾搞笑。

系統：Android 2.2

下載費用：免費

《Theme Park》自建遊樂場

香港嘅主題樂園雖然好出名，不過本地人去多幾次真係覺得悶！由遊戲大廠EA推出嘅《Theme Park》就可以畀你發揮創意，建設充滿特色嘅主題樂園。玩法同一般模擬建造遊戲一樣，玩家要慢慢喺荒地興建機動遊戲或者商店，從中賺錢同賺取超級門票去建更型、更有特色嘅過山車、海盜船等設施。難度在於玩家要不時為商店補貨、清理垃圾桶、修理設施甚至掃地，絕對係一腳踢！過癮的是機動遊戲唔單止睇得，而且仲可以控制埋，用手指一Drag為機動遊戲加速，揈得遊客開心仲有Bonus添！

系統：Android因裝置而異、iOS 4.3以上

下載費用：免費

《Angry Gran 2》見人就打

繼《Angry Gran Run》拔足狂奔之後，今次阿嫲見人就打！無論係行人定係設施，只要用武器打破佢哋就可以賺錢。不過要留意，見到白衣警察就要收手，而且地下仲會時不時有水桶碌出嚟跣你，小心！

系統：Android 2.1

下載費用：免費

《Camera360幻境情景模版》搞鬼攝影

玩特效濾鏡玩到悶的話，就不妨試玩《Camera360幻境情景模版》。佢屬於Android相機著名App《Camera 360》的增值功能，內置10款情景畀你組合相片，配合得宜的話，效果隨時意想不到。

系統：Android 1.6

下載費用：免費

《Magiapp Tricks for WhatsApp!》惡搞WhatsApp友

WhatsApp相信大家日日都用，如果太得閒冇嘢做，不妨下載呢隻新Apps惡搞身邊朋友。原來此App可以喺WhatsApp程式內，自製一張縮圖與內容不同嘅相片，譬如縮圖係靚女，打開就係醜女，任你發揮創意，隨時激死身邊朋友！

系統：Android 2.1

下載費用：免費