三藩市YouTube總部直擊！五月天Live Concert萬人環球串流撐

喺香港睇演唱會，無論紅館或博覽館，最多都係同萬幾個粉絲一齊歡呼一齊嗌；有冇諗過安坐家中，就可以同數以幾萬計粉絲一齊撐偶像呢？今次小記嚟到美國三藩市YouTube嘅San Bruno總部，親身欣賞台灣樂隊五月天嘅現場演出。最過癮係整場演唱會全程同步直播上YouTube，身處天南地北都可以超順暢即時睇串流，畫質、音效仲拍得住演唱會DVD，最高峰有成50,000名粉絲一齊睇，感覺High爆！最爽都係演唱會完結後，影片瞬間上載至YouTube，畀你即時重溫五子Rock歌！

用YouTube睇片、煲劇相信大家都試得多，近年仲興埋拍搞笑短片，得閒Relax吓不知幾過癮；咪睇小串流影片平台嘅威力，你睇Justin Bieber、Psy就知，數以億人睇，隨時變巨星。除咗提供影片上載平台之外，YouTube近年仲落手落腳自己拍片，當中Live Streaming服務回響最大，而且仲開設YouTube Presents頻道，請唔同歌手唱Live或做訪問，Justin Bieber、Jason Mraz、Katy Perry等巨星都曾參與，不過就未有華語歌手，所以今次YouTube專登請嚟紅遍亞洲、經常透過Google+平台分享最新消息嘅五月天，去到YouTube總部做Live Concert，目的梗係想加強兩個Google服務喺亞洲地區嘅滲透率啦！

順暢唔Lag機

平時睇五月天Concert想坐前排，有錢都未必買到飛，不過今次呢個「華人搖滾 全球發聲」演唱會，小記就可以輕鬆超近距離同五子接觸。YouTube總部嘅演出場地雖然唔算大，只係公開畀200名Google員工以及親友喺現場欣賞，不過氣氛依然熱烈，全場High爆；原來喺網上睇直播嘅朋友都一樣可以咁興奮，一Click上YouTube專頁就搞掂，而且全程超順暢唔Lag機，影片質素更高達720p，連收音都拍得住DVD，難怪主音阿信都叫歌迷「戴上耳機、校大音量、用力地唱！」據YouTube官方數字，演唱會最高峰時，觀看人數多達50,000人，世界各地有咁多「五迷」陪你邊聽邊睇，機會確實難得。

製作有水準

要有咁高質素嘅效果，背後全憑一班經驗豐富嘅Live Crew。現場所見，有多部攝影機負責不同遠鏡，亦有一位台下攝影師不時捕捉五子嘅Close Up鏡頭，而且仲有收音，加埋幕後做網上串流等各個部門，難怪一眾人員全程都好緊張，皆因Live Streaming冇得剪接兼冇NG，做到零失誤實在抵讚。坦白講，現場欣賞角度反而有局限，網上睇則角度立體得多，唔少粉絲就留言話效果超正！最過癮係今次Live Concert用咗YouTube呢個開放平台，現場有一幕係主音阿信叫歌迷留言寫低2013年願望，結果即時有超多「五迷」和應，夠晒互動。演唱會過後，成個騷嘅影片已經原汁原味上載至YouTube，方便大家隨時重溫。五月天嘅號召力實在驚人，演唱會喺香港時間11月29日上午11時開騷，截至同日凌晨12點，十多小時內已經有超過20萬嘅觀看次數，以及超過13,000人Like，更有接近25,000個留言，傳播率絕對唔講得笑！

今次活動「策劃人」Google台灣市場部主管利啟正（Richard）表示：「五月天很早就加入Google+，而且樂隊是華人音樂的指標，所以今年就開始一連串的密切合作，希望不同的Google服務可藉不同形式和形態結合；而今次活動就是透過YouTube Live Streaming，將演唱會完美地呈現，再透過Google+非常深入地接觸到使用者。」

Playlist

《OAOA》、《三個傻瓜》、《星空》、《突然好想你》、《孫悟空》、《乾杯》、《戀愛ING》、《離開地球表面》、《倔強》、《人生海海》、《我不願讓你一個人》、《一個蘋果》、《憨人》

歌迷有Say

bobo0745：音質、畫面都好棒，看了的得很感動。

KuyHwon Tay：直播的時候我剛好在上課，錯過了！但是幸好沒有錯過視訊聚會。

依融林：雖然沒有一起LIVE，但還有重播在，太好了！

直擊Mountain View Google總部

既然去得YouTube總部，當然不能不順道朝拜Google總部Googleplex。雖然可參觀嘅地方唔多，不過都見到唔少有趣嘅建築物及設計，睇見佢哋嘅員工有得食、有得玩，喺度返工好似好爽咁喎！

後記：Google+ Hangouts on Air 怪獸生日 粉絲慶生

玩完YouTube Live Concert之後，五月天即時轉移場地，同分別來自香港、台灣、馬來西亞、墨爾本、新加坡及內地嘅七位粉絲，透過Google+ Hangouts on Air進行一對八視像通話，彼此閒話家常。最特別係當日適逢係結他手「怪獸」生日，五月天同歌迷齊齊唱生日歌慶祝，粉絲仲用Apps即場喺Hangouts on Air嘅畫面上送咗個蛋糕畀「怪獸」，佢開心到暈！