男專女輕Pentax K-5 II/IIs、Q10

男女生揀相機的意向大不同，多數男士喜愛專業型，而女士則比較喜歡輕便可愛型。Pentax最近就有新機滿足專業和輕便兩派用家；專業派的，要留意全新旗艦級K-5 II/IIs；輕便派的，就有最小巧的Mirrorless機款Q10，各取所需。

Q10三色激細機身

愛玩Snap Shot的，新機Q10至啱你；其體積和重量比高階Proumser DC仲要輕細，就算長時間掛頸都唔覺得攰。Q10有紅、黑、銀三色畀你揀，惟獨欠缺上代Q的白色，不過紅色機身非常搶眼，而銀色跟鏡頭用色匹配，賣相非常討好。酷似玩具機的Q10，內涵一樣好玩，它配備正負逆沖效果（E沖C），仲有大量濾鏡特效，並可以疊加使用。當然唔少得Smart Effect，扭一扭前方的轉盤即可切換效果，轉盤更可以設定至色彩風格、濾鏡特效或長寬比其中一項，夠晒方便。再加上Q10擁有1,240萬像素，感光度仲可以上到ISO 6,400，環境唔夠光都一樣玩得出色，更配備彈出式閃光燈和熱靴位，以及雙轉盤操作，估唔到咁細部，都竟然有單反的配置。

SPEC

感光元件：1,240萬像素CMOS

轉換系數：5.5倍

屏幕：3吋46萬像素

快門：1/2,000~30秒

感光度：ISO 100~6,400

其他功能：1080p拍片、5fps連拍

體積：102×58×33.5mm

重量：180g

試相

使用正負逆沖效果（E沖C）拍攝的效果次次都唔同，可媲美真正的菲林E沖C，特別有驚喜。

K-5 II/IIs無懼低光對焦

今次Pentax一口氣推出K-5 II和K-5 IIs兩部機王，究竟兩者有何分別？原來K-5 IIs沒有低通濾鏡，而K-5 II則有。不設低通濾鏡，可提升影像的解像力和銳利度，不過在特定情況下，影像會有機會出現摩爾紋，尤其是拍攝高密度排列的主體，所以有辣有唔辣。至於兩機的規格完全相同，同樣內置1,628萬像素感光元件，感光度可擴展至ISO 80~51,200，連拍速度亦可達每秒七張，更配備防水滴和防塵的鎂合金機身。

至於相機必備的濾鏡特效當然唔少得，並有18種之多，想點影就點影。K-5 II/IIs特別改善對焦系統，搭載全新SAFOX X自動對焦系統，即使在-3EV的暗夜環境下，依然可以對焦無誤，更支援11點對焦點。為了在瀏覽時可以看到更清晰的影像，K-5 II/IIs的三吋92.1萬像素屏幕採用了Air-Gapless技術，有效阻隔屏幕的色散和反射問題，而最面層的玻璃更經過特別強化，有防刮花之效。

SPEC

感光元件：1,628萬像素CMOS

轉換系數：1.5倍

屏幕：3吋92.1萬像素

快門：1/8,000~30秒、B快門

感光度：ISO 80~51,200

其他功能：1,080p拍片、7fps連拍

體積：131×97×72.5mm

重量：680g

試相

捨棄低通濾鏡的K-5 IIs，仔細得連飾物上的細節都清晰可見，而且畫面非常細緻紮實。

同場加映：新鏡報到

同場有為K Mount而設的新天涯鏡smc Pentax-DA 18~270mm F3.5~6.3 ED SDM，提供15倍的變焦倍率。另外還有使用Q Mount並擁有15~45mm焦段的06 Telephoto Zoom遠攝變焦鏡頭，恒定F2.8大光圈令望遠端的散景更為淺薄。Pentax更特別推出Q Mount轉K Mount轉接環，讓Q系列機身可兼容K Mount鏡頭，轉接環更配備無段式的光圈環，可直接調校鏡頭的光圈葉，以後唔單止可以用原配的01至05鏡頭，仲可以玩埋K Mount鏡。

查詢：2926 2300