高叉女特務HT 1/6 Ada Wong
女為悅己者容，女士為瘦身，又食藥又抽脂，所費不菲仲分分鐘搵命博，相對起嚟，女性Figure雖然以往又肥又腫，但隨住技術進步，依家簡簡單單就可以立刻瘦身。日前Hot Toys就嚟個完美示範，以幾乎全包膠方式打造《Biohazard 4》嘅神秘女角Ada Wong，高叉旗袍之下，Slim身材表露無遺，性感到連喪屍都投降。
特務、性感、神秘……都係一眾《BH》玩家對Ada嘅深刻印象，難怪一出場就成為遊戲中最性感嘅女角，搞到第一女主角Jill當堂無碇企。然而，作為Ada戲份最多嘅《BH 4》，HT偏偏出完Leo、Krauser甚至電鋸男後，先至為Ada Wong出1/6 Figure，何以姍姍來遲？HT解釋︰「Ada係《BH》最受歡迎嘅角色之一，我們當然想等技術最成熟時先出。Capcom年幾前已經同我哋傾製作Ada Figure嘅可能性，當時有想過用第二或第六集做藍本，不過考慮到旗袍Look先係最經典，於是拍板用第四集造型。」
膚色細膩 惜表情欠神采
原裝Game版嘅Ada Wong並非李冰冰飾演，而係透過CG技術畫出嚟，要將2D影像化成3D實物，神似與否全賴雕師嘅功力及想像力，為此HT搵嚟韓籍大師Im Jung Hyuk操刀，再由JC.Hong塗裝。試辦所見頭雕總算呈現到角色嘅漫畫感覺，膚色白皙，輪廓亦拿捏到位，美中不足係表情應Capcom要求，感覺略為呆滯，少咗冷若冰霜嘅神秘感，若然嘴角改成微微奸笑，眼神又再生動啲，相信會更加傳神、誘人。
為性感 大規模包膠
女性Figure一向難整，除咗拿捏神韻考工夫，Body肥些少都被玩家鬧爆。針對呢點，Ada嘅素體係全新製作，以Black Widow嘅下盤做基礎，再接駁包膠上肢、雙臂及雙腿，喺接近全身包膠嘅情況下，將贅肉盡去，配合像真度高嘅緊身高叉旗袍，S身形誘人到爆！美中不足係Ball Joint略嫌大粒咗，令到手腕及腳眼位置有啲突兀，期望派貨時可以再作改善。配件方面，黑超、手機連機座、寄生體Sample箱、霰彈槍、機關槍、手槍及爪槍全部有齊，最正係送埋第六集先有嘅十字弩，換件衫就多個造型玩！
Hot Toys VGM16 《Biohazard 4 HD》 1/6 Ada Wong
零售價︰$1,280
預售價︰$1,230
推出日期︰明年第二季初
*圖中為試辦款式，與正式推出的版本或有若干分別。
查詢︰2388 4677（Toy Hunters）
Hot Toys VGM16 《Biohazard 4 HD》 1/6 Ada Wong
隨盒附有十字弩一把，去皆旺買件Deep V緊身衫返嚟換，就玩到第六集造型。
旗袍由韓籍裁縫Hai Lim主理，用數塊布料車成，直頭當真旗袍咁造。
連腳都包膠，係HT首度嘗試，可惜腳眼嘅Ball Joint太礙眼。
Body高約29cm，全身就有20個關節。
素體近乎全包膠，背面睇更覺玲瓏浮凸。
隨盒送埋黑超，遮咗木獨眼神後，感覺似乎更Sexy。
膚色、唇彩都非常逼真，但表情太木獨，未夠傳神。
武器方面包括霰彈槍、機關槍及手槍（由上至下），長短火兼備。
Game中曾經出現嘅道具，包括下排左一及左二嘅手機連機座、上排左一嘅爪槍都有齊。
第四集打生打死都要搶嘅寄生體Sample箱，內裏有齊針管及試管，好Detail。
造型手掌就有七款之多，包括握拳、握物、開掌及手指指等款式。