《XCOM: Enemy Unknown》回歸原點打外星人
家陣啲遊戲畫面確實做得好靚，爆破場面像真度極高，但論好玩同耐玩度，就同細個時沉迷嘅遊戲差好遠。好似約20年前抵抗外星人入侵為主題嘅模擬遊戲《UFO：Enemy Unknown》，正是回合制遊戲嘅典範。以為一世都玩唔番呢類極富玩味嘅遊戲？好在專做《Sid Meier》模擬遊戲系列嘅Firaxis Games拎咗返嚟重製成《XCOM：Enemy Unknown》，保留咗絕大部分原有概念之餘再用Unreal 3遊戲引擎打造，令資深玩家感動不已！
搵掩護防突襲
雖然遊戲改咗名，但遊戲主軸仍舊係講玩家全權管理抵抗外星人組織，接收世界各地嘅外星人入侵報告，然後派出小隊到各地收服外星人，即係同《Men in Black》差唔多；然後再靠賺錢同打外星人時所獲得的外星資源，研製出外星科技武器同飛船，用作增強實力，鍾情模擬遊戲類別嘅玩家，一定受落。元祖PC版《UFO：Enemy Unknown》係1994年出品，當年流行戰棋式嘅回合制玩法，即係可在有限移動點數入面行動同攻擊，所以今次2012年新版，玩法都差唔多，但最主要唔同係移動路線可不受限制，而且可以搵掩護，避免被失驚無神竄出嘅外星人襲擊。
善用移動點數
每個任務會以小隊形式出征，好似第一版可以派出四名隊員執行任務，小隊人數受制於運輸飛行器嘅大細，今集一次過最多只能帶六人出戰，遜色過元祖版可一次過出十幾名士兵。戰術方面係薄弱咗，不過勝在夠氣氛，視線以外嘅地方會以霧化處理，要行埋去先見到周圍環境，所以要小心隱藏在暗位嘅狡猾外星人偷襲，而且當士兵陣亡之後，唔止單一任務冇得用，亦唔會在遊戲中翻生，所以要小心啲用經驗值較高同官階較高嘅軍官，以免浪費「人材」。而且實戰時要留意當發現外星人嘅時候，剩餘多少移動數值，因會影響開槍或擲手榴彈嘅命中準繩度呢！
揀任務考策略
除咗喺戰場要講究戰術同策略之外，亦好講求點樣平衡基地上五個主要區域，包括：研究區、工程區、軍營區、機庫區同戰情室嘅發展同需要，例如撥多啲資源研製新武器，就有機會接受更困難嘅打外星人任務；研製新飛行器，就可縮短到場時間同接載更多士兵到場。在遊戲入面同時間會接獲世界各地嘅外星人入侵報告，但始終人手有限，玩家要選擇參與邊個任務，當中會牽涉到場時間、遊戲難度同回報。當然揀難度低嘅任務，會減低士兵陣亡嘅風險，但所獲得嘅外星物資又相對地少，而且太過側重幫某幾個國家執行任務的話，可能會引起部分國家不滿而退出聯盟，令資助被削減，遊戲平衡度確實做得唔錯。
Info
類型：策略模擬
開發：Firaxis Games
平台：Xbox 360、PS3、PC
推出日期：10月12日
售價：$388（Xbox 360）
$428（PS3）
$328（PC）
查詢： 2528 0830
《XCOM: Enemy Unknown》
主畫面會在地球上顯示有外星人入侵報告，玩家要揀選去邊度執行任務。
未搜索的地方會以霧化處理，增添遊戲的刺激感。
每個士兵都可以配備各種裝備，裝備方面要用錢買或開發新技術製造。
ET樣嘅外星人只係入門貨色，及後仲有勁嘢現身。
從高點開火能睇得清楚匿在暗處的外星人，提高命中率。
每回合士兵得有限移動點數，可平衡行動同攻擊的支出。
回顧
元祖《UFO：Enemy Unknown》
主畫面同樣以地球做背景，但當然較簡陋。
打外星人場面會以45度俯視視點進行。