秋風起追星族始動！

香港夏天熱辣辣，仲不時落雨，加上長期有煙霞，想觀星同影星的話，最好都係秋風起嘅9月至11月。由於9月喺天文上有好多比較靚嘅星空奇觀，好似顯眼嘅夏季銀河，以及天蠍座星空調色盤等等，加上唔怕太熱太凍，可以話係影星嘅最佳時機！而影星嘅基本條件，除咗周圍環境一定要夠黑之外，其實亦要有相關嘅拍攝器材同輔助儀器。以下就為大家介紹一啲入門級儀器，等大家平平哋都可以玩住先。

傻瓜級別

想影到星空，唔一定要用單鏡反光相機！如果只係影銀河或者一啲比較大嘅星體，其實一般傻瓜DC仔都夠用，不過部機最緊要支援B快門同用到線控；而ISO方面，要夠高之餘Noise亦唔可以太勁，光圈仲要愈大愈好，綜合以上條件，市面上就有兩部機推介。

最平選擇Olympus XZ-1

影星最緊要就係大光圈，同埋低Noise，而Olympus XZ-1呢部機個28~112mm ZUIKO鏡頭就有F1.8~2.5超大光圈，此外又選用面積較大的1/1.63吋1,000萬像素CMOS，Noise比一般傻瓜機低。最緊要係佢有B快門同支援計時快門遙控，要影銀河或其他入門項目，此機正是最平的選擇。

單反質素Ricoh GR Digital III

用只得定焦鏡嘅Ricoh GR Digital III，自然唔可以影啲小項目，不過佢勝在有28mm F1.9超大光圈鏡頭，而且因為佢個GR Engine III處理器有NR減訊功能，所以影出嚟啲相真係可以有單反級數。小記覺得用佢嚟影星雲，影出嚟嘅紅色確係靚，最緊要係部機細到袋咗落袋都唔覺重。

換鏡級別

第一次影銀河真係好震撼，不過影多幾次其實都幾悶，跟住就自然會想影啲比較遠嘅項目。咁一部可換鏡嘅數碼相機就唔慳得，而小記會介紹無反機種Sony NEX-5N，貪佢夠輕；而Canon EOS 60Da則係現時市面上唯一一部原廠機影到紅色星雲，係最高級嘅選擇。

降噪最強Sony NEX-5N

NEX-5N係NEX-5嘅後繼機種，其實影星嚟講NEX-5都夠用，不過有新款就梗係買新款，佢有達1,610萬像素Exmor APS HD CMOS，更加係支援B快門同計時快門遙控嘅最細無反機種，加上降噪能力非常之強，影出嚟嘅星空足以同一眾大機匹敵。

星雲大師Canon EOS 60Da

唔少天文發燒友為咗影星雲，好多時都將部相機改成可以影到Hydrogen-Alpha光線。至於原廠唔使改機就可以影嘅機種，暫時就只得Canon EOS 60Da，只要配合唔同焦距嘅鏡頭，就大把進階項目可以影，好似NGC6357龍蝦星雲及NGC6334貓爪星雲、IC1805心臟星雲及IC1848靈魂星雲等，比起一般單反多啲嘢玩，就好似發掘星空一樣，會令人樂此不疲。

入門赤道儀

你準備好相機影星未？不過有相機同快門線其實都唔代表可以即刻影到星，因為眾所周知，地球係會轉嘅，就算比你用晒腳架Set埋Timer，影出嚟嘅可能都只係一條長長嘅星軌，想要影到真係「一點一點小星星」，就要有赤道儀輔助。大家啱啱入門影星的話，其實唔使用到幾萬蚊嘅赤道儀，買入門級都可以，何況愈平就愈輕，要攜帶都方便啲啦！

SIGHTRON nano-tracker東瀛輕品

可以話係現時見過最輕便嘅赤道儀，唔單止係日本製造，體積仲只得一隻手掌咁大，400g嘅重量已可負重2kg嘅攝影器材喺上面，至啱入門。

VIXEN Polarie連地景免朦

VIXEN呢個牌子係赤道儀中嘅多產品牌，而VIXEN Polarie主打輕便，特別在有1/2星景攝影模式，用一半速度追蹤，影連地景就可以避免地景糊化。

AstroTrac TT320X AG長鏡合用

入門級赤道儀雖然輕便，但負重不高，如要用長焦距鏡頭，TT320X AG就最啱。佢長條形易攜帶，加上可以用到300mm鏡頭曝光四分鐘都無問題，係同級之中最抵買嘅款式。

對極的重要

一般赤道儀其實都非常易用，只要對好位，開着就用得，不過當中最麻煩的是要找出北極星來對極，大家可以靠星圖Apps找到北極星位置，然後按照北極星的位置來慢慢調校赤道儀的方向。開動赤道儀即可，不過攝星過程中不要郁動到腳架，否則又要再次對極，而且在多雲的天氣中，未必能順利看得見極星。不過如果拍攝銀河這些Wide Shot，只需要對在極星大概的位置也不會出現星軌，盡情拍攝吧！

影星熱點：大嶼山水口

大嶼山南部的水口，係影星極佳的位置，只因西南方就是一望無際的海，光害自然可減至最低，而且水口周圍也較少路燈，甚至連香港天文學會亦喺度設有觀測站，缺點是地方不太就腳，乘巴士之後仲要行頗遠路程。

光害：★★★★★

交通：★★★

安全：★★★

前往方法：東涌乘新大嶼山巴士11或23號線於水口村下車

北潭涌停車場

北潭涌停車場可以話係咁多個影星熱點最就腳嘅一個，因為只需要由西貢搭巴士就可以直接到達，呢度亦係本港攝星發燒友聚腳地，經常可以遇到志同道合者。而呢個地點東面同北面都十分適合影星，光害亦比其他近海地區少。

光害：★★★

交通：★★★★★

安全：★★★★

前往方法：西貢市中心乘九巴94號線於北潭涌管制站下車

天文公園

政府設立，位於萬宜水庫西壩創興水上活動中心嘅天文公園，最正係有電力供應（需要預約及收費），仲有埋追星設備同望遠鏡，無帶裝備都可以觀星，環境非常安全係賣點，不過由於無任何交通工具到達，要去就要搭的士。

光害：★★★★

交通：★★

安全：★★★★★

前往方法：可於西貢市中心乘新界的士前往，車費約$100內。

應該影咩？入門星空項目：銀河

唔需要長鏡，甚至唔使赤道儀都影得到，只需要有腳架同天朗氣清就掂。

M42（獵戶座大星雲）

M42（獵戶座大星雲）係能夠拍得最明顯嘅星雲，而且唔需要專業機已經可以影到靚效果。

進階星空項目：M31（仙女座星系）

影M31你會發現自己攝星功力，而且拍攝M31亦唔需要用影到星雲嘅天文級相機，不過就算用200mm鏡頭，個M31都可能只係佔畫面六分之一，要Crop相。

M45（七姊妹星團）

同樣係唔需要影星雲嘅機都影到，但一樣要用支長鏡，不過勝在用肉眼都可以確定位置，但係要影得好都幾難，因為好難突出到星團周圍嘅反射星雲。

必備配件：計時無線快門遙控器Pixel Timer

點解要選呢幾部相機？因為佢哋有B快門模式，又可以用計時快門遙控囉！但計時快門遙控又可以點揀呢？呢款Pixel Timer計時快門遙控器勝在夠晒「包容」，幾乎對應所有支援快門遙控嘅數碼相機，而且用法十分簡單，仲有分無線同有線兩種，真係想點揀都得。有線型號約四百多元；無線型號約六百多元，各大相機配件舖有售。

查詢：（a）2376 2150（b）2292 5111（c）2345 2966（d）3191 2333（e）2398 2888（f）9638 3899