天元再突破鑽爆荷包
山口式真係識做生意，點解？為咗慶祝動畫《天元突破 紅蓮螺巖》五周年，竟然將「咸豐年」前嘅舊版紅蓮螺巖重新翻件推出，咁即係當廣大玩具迷係水魚啫？稍安毋躁，雖然外表變化唔大，原來四肢關節都有若干改良，令甫士更自然、更熱血，而且塗裝係重新監修，QC自然比舊版好。再者，今趟追加埋大飛翼及新規鑽頭，實行以型英帥新Look鑽爆各位荷包，尤其是新入坑嘅玩家，毋須補購舊版嗰三款組成飛翼背包，慳皮得多！
多段Ball Joint大飛翼
新版紅蓮螺巖嘅最大賣點在於巨大飛行翼，能夠直接插入背部嘅四個榫位，飛行翼左右兩邊各有三組Ball Joint連接，可作兩段摺疊，機翼尾部又可以上下反轉，增加空戰造型時嘅甫士，不過榫位接合處較淺，試玩時都幾易鬆。此外，新版取消咗前作嘅巨型鑽頭，改配同手臂尺寸相若嘅金色鑽頭，又有收納專用嘅把手。至於心口嘅半透明V形黑超，可透過換件「變成」巨大回力鏢，裝埋個熱血面相，型爆！
自然有型盤坐Look
關節可動性亦係新版嘅另一亮點，特別強化咗膊頭、髖位，以及腰腹嘅齒輪Ball Joint，改用大尺寸版本，增加扭動時嘅實淨度，擺甫士更穩陣，尤其是胸部紅蓮顏面嘅嘴巴位置，利用內藏嘅Ball Joint改變表情，夠晒過癮。另外，由於關節實淨，扭動雙腳亦都易咗，玩家大可拗成盤膝而坐，而且成個Look都夠自然。
查詢：2148 9483（精品）
Revoltech Yamaguchi Series No.119《天元突破 紅蓮螺巖》$248
腰部前、左、右嘅三塊裙甲都用Ball Joint連接，唔會阻住雙腿擺動。
雙腳關節超級好扭，輕易扮到李小龍嘅飛腿Look。
拆走心口副黑超，換番冇窿嘅紅色件，再手執巨型回力鏢，一副戰鬥格出哂嚟。
關節實淨又好扭，可以擺出自然嘅盤膝甫士。
插晒鑽頭嘅飛翼有六組關節，可作兩段摺疊，可惜與背部嘅連接榫位唔夠實淨，容易邊玩邊甩。
換件Parts包括頭部及心口，咬牙切齒嘅熱血Look（右）就最過癮。
除咗有齊成Set大飛翼，隨盒仲有握物、開掌、手指指三款造型手掌，新規鑽頭又有把手方便收納。